İnşaat şirkəti olan "Şərq MTK” MMC-nin rəhbəri Ziyadxan Abbasovun ölkədən çıxışı məhdudlaşdırılıb.

Qaynarinfo xəbər verir ki, bu barədə Bakı Kommersiya Məhkəməsinin hakimi Günay Namazova qətnamə çıxarıb.

Ziyadxan Abbasova "stop” qoyulmasının səbəbi "Şərq MTK” MMC-nin külli miqdarda vergi borcu olması ilə əlaqədardır. İş adamı borcu ödəmədiyinə görə İqtisadiyyat Nazirliyi yanında Dövlət Vergi Xidməti 2 Saylı Ərazi Vergilər Baş İdarəsi xüsusi icraat qaydasında məhkəməyə ərizə ilə müraciət edib. 

İş materiallarından məlum olur ki, həmin vaxt şirkətin 51 342,53 AZN vergi borcu olub. Lakin məhkəmədən sonra da borc ödənilməyib. Hazırda "Şərq MTK” MMC-nin vergi borcu 66 449,85 AZN-ə çatıb.

MMC 2007-ci ildən fəaliyyət göstərir. Nizamnamə kapitalı 1000 AZN-dir. 

Araşdırmalarımız zamanı məlum olub ki, 2016-cı ildə də vergi borcuna görə Ziyadxan Abbasovun ölkədən çıxışı məhdudlaşdırılıb. 

"Şərq MTK”nın adı 3 il əvvəl inşa etdiyi binalardan mənzil alan vətəndaşlardan əlavə pul tələb etməkdə hallanıb. Həmin vaxt yayılan məlumatlarda bildirilirdi ki, şirkət ev alan vətəndaşlarla müqavilələri yeniləyərkən mənzilin sahəsini artırararaq, onlardan buna görə əlavə pul tələb edib. 

Ziyadxan Abbasov həmin vaxt bu iddialarla bağlı deyib ki, mənzillər satılarkən sahəsi təxmini hesablanıb. Sakinlər isə bu arqumenti qəbul etməyərək, aldadıqlarını bildiriblər.