Naxçıvan Muxtar Respublikasında daha bir sabiq nazir həbs edilib.

Valyuta.Az APA-ya istinadla xəbər verir ki, Naxçıvanın sabiq təhsil naziri Məmməd Qəribov saxlanılıb. 

Baş Prokurorluğun Mətbuat Xidməti məlumatı APA-ya təsdiqləyib.

Unikal/org onun külli miqdarda dövlət vəsaitini mənimsəmədə ittiham olunduğu bildirir.

Valyuta.Az xatırladır ki, bu barədə ovqat.com hələ fevral ayının ortalarında məlumat yaymış və bildirmişdi ki, M.Qəribovu günün günorta çağı Bakıda saxlayıb Naxçıvana aparıblar. 
 
Əməliyyatın MR polisi tərəfindən həyata keçirildiyi xəbər verilirdi.

Saytın yazdığına görə, Məmməd Qəribov 2018-ci ildə Vasif Talıbovun fərmanı ilə Muxtar Respublikanın Təhsil naziri vəzifəsindən azad edilmişdi. Bu fərmandan sonra Naxçıvanda qalmayıb Bakıya köçən sabiq nazir özünə uyğun iş axtarışına başlamışdı. Lakin ixtisasına uyğun iş axtarışları nəticə verməyən M.Qəribovun “Neftçilər” metrostansiyasının yanındakı kiçik dükanlardan birində telefon satmaqla məşğul olduğu bildirilirdi.
 
Sayt onu da bildirirdi ki, M.Qəribovun Naxçıvan təhsil sistemi haqqında yazdığı şikayət məktubları onun həbsində əsas rol oynayıb.

Bu həbsin Naxçıvan şəhər Təhsil şöbəsini də yerindən oynatdığını vurğulayan sayt əlavə edir ki, şöbə müdiri Elşən Qəbulov artıq vəzifədən uzaqlaşdırılıb və şöbənin bir neçə işçisi də saxlanılıb.