Təhsil Nazirliyinin Təsərrüfat Hesablı Əsaslı Tikinti və Təchizat İdarəsi bu yaz aylarında satınalma proseslərinə sürətli giriş edib.

Valyuta.az xəbər verir ki, mart-aprel ayında Təhsil Nazirliyi 42 milyon manatlıq satınalma planı ilə çıxış edib.

Belə ki, mart və aprel ayları ərzində ümumi dəyəri 42 milyon 80 min 126 manat olan 6 tender elan olunub. Siyahı təsərrüfatdan idman zalına, məktəb mebelindən avadanlıqlara qədər geniş spektri əhatə edir.

Ən son tender idman inventarının və digər avadanlıqların satın alınması ilə olub. 2 milyon 135 min 692 manatlıq bu müqavilə üzrə iştirak üçün son tarix 12 may müəyyən edilib.

Amma bu elan mart-aprel dövründəki tenderlərin yalnız bir hissəsidir. Məlumata görə, aprelin 3-də açıqlanan tenderdə Sumqayıt şəhəri üzrə 21 nömrəli, 1176 şagird yerlik məktəbin əsaslı təmiri nəzərdə tutulub. Bu layihənin maliyyə dəyəri 4 milyon 616 min 473 manat təşkil edir və təkliflərin 1 mayadək təqdim olunması tələb olunur.

Nazirlik martın 19-da isə bir gündə 4 tender elan edib. Onlardan ikisi yumşaq inventar, yataq dəstləri və xüsusi geyimlərin satınalınması ilə bağlıdır – biri məktəbəqədər təhsil müəssisələri (4 milyon 707 min 431 manat), digəri isə ümumtəhsil müəssisələri (5 milyon 634 min 457 manat) üçün nəzərdə tutulub.

Elə həmin gün təqdim edilən digər tenderlərdən biri isə dəftərxana və təsərrüfat mallarının alınması ilə bağlı olub.  Ən yüksək məbləğli layihə 21 milyon 534 min 235 manat dəyərindədir. Bu tender 15 mayadək qüvvədə olacaq.

Sonuncu layihə isə məktəbəqədər təhsil müəssisələri üçün “Maşın və avadanlıqlar” xərc maddəsi üzrə satınalmaları əhatə edən 3 milyon 451 min 836 manat dəyəri olan layihə olub.

Qeyd edək ki, hazırda bütün tenderlər qüvvədədir. Mart ayının 19-da elan olunan bütün tenderlər aprelin 30-dək ( istisna dəftərxana və təsərrüfat mallarının satınalınması ilə bağlı olan tender mayın 15-dək) davam edəcək. 

Sərvanə Rəmixanova