Səs, hərəkət və ekran sənətçilərini təmsil edən SAG-AFTRA həmkarlar ittifaqı "Fortnite" oyununda Ceyms Erl Consun səsi ilə canlandırılan "Darth Vader" obrazının süni intellekt vasitəsilə təqlid edilməsinə qarşı çıxıb. 

Valyuta.az xəbər verir ki, həmkarlar ittifaqı "Epic Games" şirkətinin hər hansı razılaşma aparmadan süni intellektdən istifadəyə keçməsini tənqid edir və bu addımı qeyri-ədalətli əmək praktikası kimi qiymətləndirir.

Şikayətdə oyunda istifadə edilən və Consun səsini imitasiya edən süni intellekt modelinin oyunçuların hərəkətləri və suallarına cavab verə bilməsi vurğulanır. SAG-AFTRA-nın mövqeyinə görə, üzvlərinin süni intellekt texnologiyasından öz razılıqları ilə istifadə etmə hüququna hörmət edilir, lakin bu texnologiyanın orijinal sənətkarların əvəzinə istifadə olunması mütləq kollektiv razılaşmalar çərçivəsində müzakirə olunmalıdır.

Həmkarlar ittifaqının açıqlamasında deyilir: "İkonik obrazların ritmini və tonunu əks etdirən səslərin, üzvlərimizin əməyi əvəzinə istifadə olunmasına qarşı çıxırıq və bunun müqabilində haqlarımızı qoruyuruq".

SAG-AFTRA, süni intellektin getdikcə daha çox iş qüvvəsinin yerini aldığı bir dövrdə bəzi üzvlərinin bu texnologiyadan narahat olduğunu bildirir. Həmkarlar ittifaqı aktyor performanslarının süni intellektlə təqlid edilməsinə köklü şəkildə qarşı deyil. Hətta bəzi süni intellekt şirkətləri ilə əldə edilən razılaşmalar sayəsində bu texnologiyaların üzvləri qoruyacaq xüsusi müqavilələrlə istifadəsi təmin olunur.

Lakin "Epic Games"in "Darth Vader" obrazında süni intellekt səsindən istifadə etmə qərarını SAG-AFTRA ilə əvvəlcədən razılaşdırmadan verməsi gərginliyə səbəb olub.

SAG-AFTRA bildirir ki, "Fortnite" oyununun istehsalçısı olan Llama Productions insan sənətçilər əvəzinə süni intellekt istifadə etməyi qərara alıb və bu addımı nə həmkarlar ittifaqına öncədən bildirib, nə də lazımi danışıqları aparıb. "Epic Games"dən məsələyə dair rəy alınmağa çalışılsa da, hələlik rəsmi açıqlama verilməyib.

Video-oyun sənayesində səs və hərəkət ifaçılığı sahəsində süni intellekt istifadəsi, sənətçilərin və yazıçıların da iştirak etdiyi əmək mübarizələrində əsas mübahisə mövzusuna çevrilib. SAG-AFTRA ilə oyun şirkətləri arasında interaktiv media müqavilələrinin danışıqları ötən il başa çatıb. 2023-cü ilin ikinci yarısından bəri davam edən bu grev həm aktyorlar, həm də ssenaristlər tərəfindən geniş şəkildə dəstəklənir.

Paşa Məmmədli