Dövlət Statistika Komitəsinin yaydığı məlumata görə, bu ilin ilk dörd ayı ərzində Azərbaycanda əsas kapitala 5 milyard 69,3 milyon manat və yaxud ötən ilin eyni dövrü ilə müqayisədə 4,6 % az investisiya yönəldilib.

Məlumata görə, son 1 ildə neft-qaz sektoruna yönəldilmiş investisiyalar 22,7 % azalıb, qeyri neft-qaz sektoruna yönəldilmiş investisiyalar isə 5,3 % artıb.

Müşahidə olunan bu investisiya geriləməsi iqtisadiyyatın hansı sektorlarını daha çox təhdid edir, inkişafını ləngidir?

Bu vəziyyət nə qədər davam edə bilər?

Mövzu ilə bağlı Valyuta.az-a danışan iqtisadçı Natiq Cəfərli bildirib ki, Azərbaycanda investisiyaların əsas mənbəyi dövlət büdcəsidir:

“Dövlət büdcəsinin birinci rübdə xərclənmə sürəti daha aşağı olur. Ona görə də investisiyaların bu dövrdə azalması daha çox bununla əlaqəlidir. İqtisadiyyata investisiya qoyuluşu prosesi üçüncü və dördüncü rübdə daha da sürətlənir”.

Ekspert əlavə edib ki, Azərbaycan iqtisadiyyatına xarici investisiyaların qoyuluşu çox zəifdir, bu isə yeni iş yerlərinin yaradılmasını ləngidən əsas amillərdən biridir:

“Ona görə də investisiya mühitinin yaxşılaşdırılması, daha çox xarici sərmayənin cəlb edilməsi iqtisadi inkişaf üçün vacibdir”.

Günay