Azərbaycanın pivə sənayesində önəmli yerə sahib olan "Bakı-Pivə" ASC-nin səhmdarlarının növbəti ümumi yığıncağı keçiriləcək.

Valyuta.az-ın məlumatına görə, cəmiyyətin nizamnaməsinin 6.6 və 6.7-ci maddələrinə əsasən səsvermənin qiyabi şəkildə keçirilməsi planlaşdırılır.

Məlumata görə, yığıncaq 30 iyun 2025-ci il tarixində saat 10:00-da Abşeron rayonu, Xırdalan şəhəri, Şamaxı şosesi, ev 1 ünvanında keçiriləcək.

Ümumi yığıncağın gündəliyinə aşağıdakı məsələlər daxildir:

1. Ümumi yığıncağın sədri və katibinin seçilməsi;

2. Təftiş komissiyasının buraxılması və yeni üzvlərin seçilməsi;

3. Hesablama komissiyasının buraxılması və yeni üzvlərinin seçilməsi;

4. Cəmiyyətin Müşahidə Şurasının sədri və üzvlərinin seçilməsi;

5. 2023 və 2024-cü maliyyə illərinin nəticələrinə əsasən şirkətin hesabatlarının, balans hesabatlarının, mənfəət və zərər hesabatlarının təsdiq edilməsi;

6. 2023 və 2024-cü maliyyə illərinin nəticələrinə əsasən dividendlərin ödənilməsi;

7. Cəmiyyətin balansında olan, Abşeron rayonu, Xırdalan şəhəri, Şamaxı şosesi, ev 1 ünvanında yerləşən ofis binası və istehsalat sahəsinin bazar dəyərinə (rəsmi qiymətləndirmə hesabatına əsasən) satılması.

Qeyd edək ki, "Bakı-Pivə" zavodu 1969-cu ildə Xırdalan şəhərində istifadəyə verilib və uzun illər ərzində ölkənin ən böyük pivə istehsalçılarından biri kimi fəaliyyət göstərib. Nizamnamə kapitalı 2 471 400 manat olan şirkətin qanuni təmsilçisi Antulis Alius.

Maya Hüseynova