"Star Wars" (Ulduz döyüşləri) pərəstişkarlarını həyəcanlandıracaq yeni bir texnoloji yenilik gerçəkləşib. 

Valyuta.az xəbər verir ki, Polşanın "Volonaut" adlı şirkəti film seriyasındakı "speeder" adlı uçan motosikletlərdən ilham alaraq "Airbike" adlı bir cihaz hazırladığını açıqlayıb. Yeni nəsil bu hava nəqliyyatı vasitəsi saatda 150-200 km sürətə çata bilir və ən əsası, uçmaq üçün pervanəyə ehtiyac duymur.

"Speeder" - "Star Wars" filmlərində tez-tez qarşımıza çıxan, yerdən bir neçə metr yüksəklikdə sürətlə hərəkət edən uçan motosikletlərə verilən addır. Bu cihazlar, gələcək texnologiyalarının rəmzi kimi qəbul olunur.

"Volonaut" şirkətinin verdiyi məlumata görə, "Airbike" dünyada pervanə istifadə etmədən uça bilən ilk hoverbikedır. Qurğunun gövdəsi və aerodinamik quruluşu ilə "Star Wars"dakı "speeder"lərə bənzədiyi qeyd olunur. Şirkətin paylaşdığı videolarda, cihazın üzərində oturan bir şəxsin havada asanlıqla süzülməsi və bir anlıq sabit şəkildə dayanaraq kameraya əl sallaması görünür.

"Bu inqilabi dizayn, məşhur elmi-fantastik filmlərdə yer alan speeder velosipedlərinə çox bənzəyir", deyə şirkət qeyd edir.

"Airbike" haqqında texniki məlumatlar hələlik gizli saxlanılır. Şirkətin qurucusu, polşalı ixtiraçı Tomas Patanın rəhbərliyi ilə cihazın "gizli inkişaf mərhələsindən" yeni çıxdığı bildirilib. "Volonaut" "Airbike"ni “səmalara yönəlmiş super velosiped” kimi xarakterizə edir və qurğunun jet mühərriki ilə çalışdığını da əlavə edir. Lakin satış tarixi və şərtləri barədə hələ heç bir rəsmi açıqlama verilməyib.

Paşa Məmmədli