Dünyanın ən böyük elektrikli nəqliyyat vasitələri batareya istehsalçısı olan Çin şirkəti "Contemporary Amperex Technology Company Limited" (CATL) elektrikli avtomobil sənayesində yeni bir mərhələ açacaq texnologiyasını təqdim edib. 

Valyuta.az xəbər verir ki, şirkət yalnız 5 dəqiqəlik enerji doldurma ilə 800 kilometrə qədər məsafə qət etməyə imkan verən ikinci nəsil "Shenxing" batareyasını təqdim edib.

CATL tərəfindən "WeChat" sosial şəbəkəsində yayımlanan məlumatda qeyd olunur ki, yeni "Shenxing" batareyası 5 dəqiqəlik enerji ilə avtomobilə 520 kilometr əlavə yürüş məsafəsi qazandırır. Bu müddət, adi yanacaqlı avtomobillərin yanacaq doldurma vaxtı ilə müqayisə oluna biləcək qədər qısadır.

CATL-nin bu yeniliyi, sektorda sürətli enerji doldurma sahəsində öncül sayılan "Tesla" və "BYD" şirkətlərini də geridə qoyur. Məsələn, BYD ötən ay 5 dəqiqədə 400 kilometr yürüş təmin edən sistemini təqdim etmiş, ancaq bəzi analitiklər texniki çətinliklər və yüksək xərclər səbəbindən bu texnologiyanın geniş tətbiqinə şübhə ilə yanaşmışdılar.

Əgər CATL-nin texnologiyası genişmiqyaslı şəkildə tətbiq oluna bilərsə, bu, elektrikli avtomobil istifadəçilərinin ən böyük narahatlığı olan yürüş məsafəsi və şarj müddəti ilə bağlı problemləri əhəmiyyətli dərəcədə azalda bilər.

Yeni "Shenxing" batareyasının texniki xüsusiyyətləri:

* Yürüş məsafəsi: 800 kilometr
* Şarj gücü: 1,3 meqavat
* İşləmə temperaturu: -10°C-də yüksək performans

Bundan əlavə, CATL bazara "Naxtra" seriyasından olan və dünyanın ilk kütləvi istehsal olunan sodyum-ion batareyasını da təqdim edib. Bu texnologiya litiuma olan asılılığı azaltmaqla yanaşı, xərcləri aşağı salmağı və -40°C-dən +70°C-yə qədər olan ekstremal temperatur şəraitində işləmə qabiliyyətini təmin etməyi hədəfləyir.

Xüsusilə ağır tonnajlı yük maşınları üçün nəzərdə tutulmuş bu sodyum-ion batareyaların 8 ildən çox xidmət müddəti olduğu və ənənəvi qurğuşun-turşu batareyalara nisbətən daha aşağı dövrü xərclər və daha yüksək səmərəlilik təmin etdiyi bildirilir.

CATL-nin Şenzen birjasında listələnən səhmləri bu açıqlamadan sonra təxminən 1% artıb.

Paşa Məmmədli