Statistik göstəricilərə əsasən, 2025-ci ilin yanvar-mart aylarında Azərbaycana geyim məhsullarının idxalında ötən ilin eyni dövrü ilə müqayisədə əhəmiyyətli artım qeydə alınıb.

Valyuta.az-ın statistik mənbələrə istinadən verdiyi məlumata görə, bu ilin ilk üç ayında ölkəyə 103 milyon 986 min 500 ABŞ dolları dəyərində geyim əşyaları və geyim üçün ləvazimatlar idxal olunub. 2024-cü ilin eyni dövründə isə bu göstərici 85 milyon 355 min 260 dollar təşkil edib.

Beləliklə, illik müqayisədə geyim məhsullarının idxal dəyəri 18 milyon 631 min 240 dollar artıb ki, bu da təxminən 21,8 faizlik artım deməkdir.

Bununla yanaşı, geyim məhsullarının ümumi idxalda payı azalıb. 2025-ci ilin ilk rübündə bu məhsullar ümumi idxalın 1,84 faizini təşkil edib. Halbuki 2024-cü ilin eyni dövründə bu göstərici 2,30 faiz idi. Beləliklə, ümumi idxaldakı payda 0,46 faiz bəndi azalma baş verib.

Sərvanə Rəmixanova