Yunanıstan hökuməti Afinadakı Akropolis abidəsi üzərində baş tutan və "Adidas" brendinin reklamını ehtiva edən dron şousuna görə məhkəmə iddiası qaldırıb.

Valyuta.az xəbər verir ki, görüntülərdə UNESCO-nun Dünya İrsi Siyahısında yer alan Akropolis üzərində "Adidas" loqosu və "Feel Fast" (özünü sürətli hiss et) şüarı ilə dron şousu nümayiş olunub.

Şou zamanı dronlar brendə məxsus idman ayaqqabısı formasını alıb.

Yunanıstanın mədəniyyət naziri Lina Mendoni bildirib ki, bu aksiya Mədəniyyət Nazirliyinin icazəsi olmadan həyata keçirilib və kommersiya məqsədilə qədim abidənin qanunsuz istifadəsidir. Nazir vurğulayıb ki, hadisə milli qanunlara ziddir və məsul şəxslər barəsində məhkəmə iddiası qaldırılıb.

Sosial mediada bir çox Afina sakini baş verənlərə etiraz edib və "Adidas"ın boykot edilməsinə çağırışlar səsləndirilib.

"Adidas" isə məsələ ilə bağlı açıqlamasında bütün icazələrin alındığını və Akropolis görüntüsündən reklam məqsədilə istifadə olunmadığını bildirib. Hazırda Mədəniyyət Nazirliyi hadisənin detallı araşdırmasını aparır.

Qeyd edək ki, bir neçə həftə əvvəl Yunanıstan hökuməti rejissor Yorqos Lantimosun Akropolisdə film çəkmək istəyi ilə bağlı müraciətinə mənfi cavab vermişdi.

Daha ətraflı "The Guardian" saytının videogörüntüsündə: