iOS 18 ilə birlikdə təqdim olunan və böyük maraq doğuran "Apple Intelligence" adlı süni intellekt funksiyaları artıq bir sıra "iPhone" istifadəçiləri üçün əlçatan olub. 

Valyuta.az xəbər verir ki, bəzi tətbiq tərtibatçıları bu funksiyaların öz platformalarında istifadəsini məhdudlaşdırmaq qərarına gəlib. Bu qərarlardan biri də sosial media nəhəngi "Meta" şirkətinə aiddir.

Braziliyada fəaliyyət göstərən "Sorcererhat Tech" texnoloji bloqunun yaydığı məlumata görə, artıq "Apple Intelligence" funksiyalarından "Meta"ya məxsus heç bir tətbiqdə istifadə etmək mümkün deyil. Bu məhdudiyyətlərə "Facebook", "Instagram", "Threads" və "WhatsApp" da daxildir.

Məlumatda qeyd olunur ki, “iPhone”larda süni intellekt tərəfindən təklif olunan və istifadəçilərə mətn yaratmaq və redaktə etmək imkanı verən yazı alətləri bu tətbiqlərdə deaktiv edilib. Həmçinin, emoji və stiker əlavə etmək kimi funksiyaların da sözügedən platformalarda işləmədiyi bildirilir.

Sərvanə Rəmixanova