Vyetnam hökuməti, ABŞ ilə ticarət əlaqələrini möhkəmləndirmək məqsədilə öz ərazisindən keçən Çin mənşəli mallara nəzarəti artıracağını və Pekinlə ticarət qaydalarını sərtləşdirəcəyini bəyan edib. 

Valyuta.Az-ın verdiyi xəbərə görə, bu addım, Vaşinqtonun "Vyetnamda istehsal olunub" etiketi ilə Çin məhsullarının ABŞ bazarına daxil olmasından narahatlığına cavab olaraq atılıb.​

"Reuters" agentliyinin əldə etdiyi hökumət sənədinin layihəsinə əsasən, Hanoy ABŞ-yə ixrac edilən Çin mallarının Vyetnam ərazisindən keçidinə daha ciddi nəzarət mexanizmləri tətbiq edəcək. Bu tədbirlər, Çin məhsullarının ABŞ-nin yüksək idxal rüsumlarından yayınmasının qarşısını almağa yönəlib.​

Bundan əlavə, Vyetnam hökuməti yarımkeçiricilər və peyk avadanlıqları kimi ikili təyinatlı malların Çinə ixracına nəzarətin gücləndirilməsi barədə qərar layihəsini təqdim edib. Bu, ABŞ-nin texnoloji təhlükəsizlik sahəsindəki narahatlıqlarını azaltmaq məqsədi daşıyır.​

Xatırladaq ki, ABŞ Prezidenti Donald Tramp aprelin 2-də 185 ölkə və ərazidən gələn məhsullara gömrük rüsumlarının tətbiq ediləcəyini elan edib. 10% həcmində universal tariflər aprelin 5-də, fərdi tariflər isə aprelin 9-da qüvvəyə minib. Bundan əlavə, ABŞ administrasiyası aprelin 3-dən bütün idxal edilən avtomobillərə 25% həcmində gömrük rüsumları tətbiq edib. Tramp, həmçinin iqtisadi durumla əlaqədar ölkədə fövqəladə vəziyyət rejimi elan edib .​

Aydın