Bu ilin yanvar-mart aylarında əsas kapitala 3 milyard 467 milyon 700 min manat məbləğində investisiya qoyulub.

Valyuta.az xəbər verir ki, bu göstərici əvvəlki ilin müvafiq dövrü ilə müqayisədə 10,1% azdır.

Bundan əlavə neft-qaz sektoruna yönəldilən investisiyaların həcmində 24,2%, qeyri neft-qaz sektoruna yönəldilən investisiyaların həcmində isə 2,4% azalma müşahidə olunub.

İstifadə olunan investisiyanın 1 814,6 milyon manatı  və ya 52,3%-i məhsul  istehsalı  sahələrinə, 970,2 milyon manatı (28,0%-i) xidmət sahələrinə, 682,9 milyon manatı (19,7%-i) isə yaşayış evlərinin tikintisinə sərf olunub.

Əsas kapitala yönəldilən investisiyaların 2 519,0 milyon manatını və ya 72,6%-ni daxili investisiyalar təşkil edib. Əsas kapitala yönəldilən investisiyaların 2 693,5 milyon manatı və ya 77,7%-i isə bilavasitə tikinti-quraşdırma işlərinin yerinə yetirilməsinə sərf olunub.