"Tesla" şirkəti Çində satışda olan "Model S" və "Model X" elektrikli avtomobilləri üçün rəsmi internet saytından "indi sifariş et" seçimini ləğv edib. 

Valyuta.az xəbər verir ki, bu addım ABŞ prezidenti Donald Trampın tətbiq etdiyi yüksək gömrük rüsumlarına qarşı Çin tərəfindən verilən cavab tədbirlərindən bir neçə gün sonra atılıb.

"Wayback Machine" tərəfindən arxivləşdirilmiş ekran görüntüsünə əsasən, mart ayının sonunda "Tesla"nın Çin versiyalı saytında hər iki model üçün "indi sifariş et" seçimi mövcud idi. Lakin cümə günündən etibarən bu seçim artıq saytda görünmür. Buna baxmayaraq, 759 900 yuan (təxminən 103 800 ABŞ dolları) dəyərində olan, ağ rəngli "Model S" kimi stokda olan avtomobillər hələ də satışda qalır.

"Tesla"nın Çindəki nümayəndələri məsələ ilə bağlı şərh verməkdən imtina ediblər.

ABŞ prezidenti Tramp, həm Çinlə olan ticarət kəsirini azaltmaq, həm də ABŞ-ın idxal vergilərinə qarşı cavab tədbirləri gördüyü üçün Pekini cəzalandırmaq məqsədilə Çin məhsullarına 125 faiz gömrük rüsumu tətbiq edib. Bu rəqəm, bu ilin əvvəlində Çin tərəfindən fentanil qaçaqmalçılığına görə tətbiq olunan 20 faiz rüsumun üzərinə əlavə olunmaqla ümumi rüsumu 145 faizə yüksəldib.

Çin də ABŞ məhsullarına qarşı cavab olaraq bütün amerikan mallarına tətbiq olunan vergiləri 84 faizə qədər artırıb. Bundan əlavə, Pekin ABŞ filmlərinin ölkəyə giriş kvotasını azaltmağı planlaşdırdığını açıqlayıb.

"Tesla"nın Şanxaydakı zavodunda yalnız "Model 3" və "Model Y" modelləri istehsal olunur. Bu avtomobillərin əksəriyyəti ya Çində satılır, ya da Asiyanın digər bölgələrinə ixrac olunur. Çində "Model S" və ya "Model X" almaq istəyən müştərilər bu avtomobilləri xaricdən idxal etməli olurlar.

Paşa Məmmədli