Məcburi Köçkünlərin Sosial İnkişaf Fondunun elan etdiyi tenderə yekun vurulub.

Valyuta.Az xəbər verir ki, Fond tərəfindən elan edilən 1.8 milyon manatlıq tenderin qalibi “Məişət İst” MMC olub.

Ödəniləcək məbləğ müqabilində şirkətə məcburi köçkünlərin yeni salınmış yaşayış məntəqələrinə geri qayıdışı üçün məlumatlandırma, təbliğat-izahat və təşviqat işlərinin aparılması həvalə olunub. 

Qeyd edək ki, bura Böyük Qayıdışa Dair I Dövlət Proqramı çərçivəsində işğaldan azad edilmiş ərazilərin bərpası, dayanıqlı inkişafı və məcburi köçkünlərin daimi yaşayış yerlərinə qayıdışı barədə əhali arasında məlumatlılığın artırılması, maarifləndirmə tədbirlərinin genişləndirilməsi üçün təbliğat işlərinin şaxələndirilməsi məqsədilə kütləvi iştirak nəzərdə tutulan irihəcmli tədbirlərin təşkili və s. xidmətlər daxildir.

Araşdırmalarımız zamanı məlum olub ki, bu, şirkətin qalib gəldiyi ilk milyonluq tender deyil.

2023-cü il ərzində Bərdə rayon ərazisində yerləşən bütün məktəbəqədər təhsil müəssisələrinin yeməklə təchiz olunması 3.1 milyon manata “Məişət İst” MMC-yə həvalə olunub. 

2024-cü il ərzində Bərdə, Ağcabədi və Tərtər rayonlarının ərazisində yerləşən bütün məktəbəqədər təhsil müəssisələrinin yeməklə təchiz olunması da yenə bu şirkətə tapşırılıb. Bunun müqabilində isə Təhsil Nazirliyinin Təsərrüfathesablı Əsaslı Tikinti və Təchizat İdarəsi tərəfindən 8.2 milyon manat vəsait alıb.

Əlavə edək ki, 17 avqust 2009-cu il tarixində dövlət qeydiyyatına alınan şirkət 6 manat nizamnamə kapitalına malikdir. Şirkətin qanuni təmsilçisi Nicat Cəfərov İzahat oğludur. Hüquqi ünvanı AZ1149, Bakı Şəhəri Xətai Rayonu, Əhmədli Ştq, General Şıxlinski, ev 1A ünvanında yerləşir.

Rəhim