Beynəlxalq reytinq agentliyi "Fitch Ratings" ABŞ-ın tətbiq etdiyi tarifələrin ölkədə iqtisadi tənəzzül risklərini ciddi şəkildə yüksəltdiyini və gözlənilən qiymət şokları fonunda ABŞ Mərkəzi Bankının (FED) faiz dərəcələrini daha da azaltmaq imkanlarını məhdudlaşdırdığını bildirib.

Valyuta.az-ın məlumatına görə, "Fitch" tərəfindən yayımlanan açıqlamada qeyd olunur ki, ABŞ-ın tarif tədbirlərinin maliyyə baxımından təsiri qarışıqdır və bu tədbirlər əsas iqtisadi problemləri həll etməyə kifayət etmir.

Bəyanatda tarif gəlirlərinin 2025-ci ildə ABŞ-ın büdcə kəsirinin azalmasına kömək edəcəyi bildirilsə də, iqtisadi artıma vurulan zərbə və əlavə vergi endirimlərinin uzunmüddətli maliyyə faydalarını məhdudlaşdıracağı vurğulanıb.

Açıqlamada həmçinin qeyd olunub ki, uzunmüddətli dövlət xərcləri ilə bağlı təzyiqlər həll olunmadığı müddətdə ABŞ-ın dövlət borcunun ÜDM-ə nisbətini sabit saxlamaq çətin olacaq.

2 aprel tarixində açıqlanan qarşılıqlı tarif qərarları ilə ABŞ-ın effektiv tarif dərəcəsinin təxminən 25 faizə yüksəldiyi bildirilib. Yüksək effektiv tarif dərəcəsinin digər şərtlər dəyişməz qaldığı halda daha çox gəlir artımı anlamına gəldiyi qeyd edilib.

"Fitch" bu vəziyyətlə bağlı belə bir qiymətləndirmə verib: "Tarifələrin ABŞ-da iqtisadi tənəzzül risklərini əhəmiyyətli dərəcədə artırdığına və qiymətlərdə gözlənilən şoklar fonunda Fed-in faizləri daha da endirmək qabiliyyətini məhdudlaşdırdığına inanırıq".

Açıqlamada daha kəskin bir iqtisadi yavaşlamanın tariflərdənkənar gəlirlər üzərində ciddi təzyiq yaradacağı və avtomatik sabitləyici mexanizmlər vasitəsilə dövlət xərclərini artıracağı qeyd olunub. Bu təsirlərin tariflərdən əldə olunan ani gəlir artımını gecikdirəcəyi, lakin maliyyə bazarlarında baş verə biləcək dalğalanmaların yaratdığı mənfi təsirlərlə birlikdə 2026-cı ildən etibarən daha aydın şəkildə hiss olunacağı düşünülür.

Paşa Məmmədli