Hər gün inkişaf edən biznes sahəsi genişlənir, sektorlar artır. Məhz buna görə də investorlar bizneslə bağlı bir çox sektorları, biznes sahələrini diqqətdə saxlayır. Biznesdə önəmli və maraqlı sahələrdən biri də kitab satışıdır. Kitab satışı sahəsi görünən qədər sadə olmayan, həm bilik, həm də səbr tələb edən bir fəaliyyət növüdür. Bəs kitab mağazası açmaq üçün nələrə diqqət etmək lazımdır? Bakıda kitab mağazası açmaq üçün nə qədər maliyyə tələb olunur?

"Papillon" kitab evinin rəhbəri Tariyel Əliyev Valyuta.az-a bildirdi ki, kitab mağazası açan hər insanın bu sahədən anlayışı olmalıdır: “Kitab mağazası açmaq belədir ki, gərək məşğul olduğun sahədən anlayışın olsun. Yəni, kitab işini az-çox bilən, bu sahədə “bişmiş” bir adam mağaza aça bilər. Məsələn, kimsə eşidə bilər ki, bu sahədə gəlir, xeyir var. Yalnız bu fikirlə yola çıxanların bu işdə uğur qazanmağı çətindir".

Maliyyə məsələsindən danışan T.Əliyev bildirdi ki, kiçik bir kitab mağazası açmaq üçün 40-50 min manat pul lazım olur: "Çünki nəşriyyatlar müəyyən kitabları nisyə, müəyyən kitabları da nağd verirlər. Yaxud mağazaya yığılan rəflər, işçiyə veriləcək əmək haqqı, məkan üçün verdiyin vergi və.s daxildir. Yəni, sadalananlar üçün mütləq 50-60 min manat pulun olmalıdır".

"İş qurursansa, hər gün işin başında olmalısan, dayandırmaq olmaz” - deyə T.Əliyev əlavə edib.

Seçimlər arasında məkana önəm verin 

T.Əliyev bildirdi ki, yer seçimi olduqca önəmli məsələdir: “Yer məsələsinə gəldikdə isə düzgün satış, uğur üçün yer məsələsi də önəm daşıyır. Nə qədər mağazalar var ki, qısa müddətdə açılıb-bağlanıb. Çünki seçdikləri məkanlar əlverişli olmur, düzgün seçim etmirlər”. 

Kitab mağazası açmaq gəlirli biznesdirmi?

Kitab mağazasının gəlirli biznes olub-olmaması haqqında danışan Tariyel Əliyev bildirdi ki, əslində bu gün üçün gəlirli biznes sayılmaz: “Fikir vermisinizsə, kitab mağazalarında ancaq kitablar satılmır. Burada kitablardan başqa müxtəlif oyuncaqların, məktəbə aid ləvazimatların və.s satışı da həyata keçirilir. Yəni, kitab mağazalarını kitablar yox, əsas məktəbə aid kitablar, dəftərxana və oyuncaq satışı saxlayır. Təbii ki, kitab mağazalarını kitabların saxladığı dövrü görmək bir kitabçı kimi mənə də xoş olardı”.

Bu yolda maliyyə düşünməyin

T.Əliyev deyir ki, ilk bir neçə il gəliri düşünməyin: “Gəlir məsələsinə gəldikdə isə, bu işlə məşğul olan insan qoyduğu maliyyəni 3 il gözdən çıxarmalıdır. Məsələn, kitab mağazası üçün 50-60 min manat pul qoya bilər. Amma 3 il ərzində oradan pul götürə bilməz. Hətta ola bilər ki, 1-ci il ziyan olsun, 2-ci il məkanı tanıtsın, 3-cü ildən az-çox bəlkə də xeyir götürsün. Məhz buna görə də bu yolda maliyyəni düşünməyin”.

Kifayət qədər kitab mağazası var, lakin…

T.Əliyev deyir ki, Bakıda 70-ə yaxın kitab mağazası olsa da, doğru yanaşma ilə bazara daxil olub uğur qazanmaq mümkündür: “Bakıda kifayət qədər kitab mağazası olsa da, problemlər də var. Kitab sahəsində boşluq çoxdur. Hazırda çox sayda çap olunmağı gözləyən, çap olunmağa ehtiyacı olan kitablar olsa da, eyni kitabları 5-6 nəşriyyat çap edir. Bu boşluqlar həll olunmalıdır. Çünki boşluqları həll edərək bazara daxil olan bizneslər daha uğurlu ola bilər. Hər kəsin etdiyini təkrarlamaq, eyni kitabları nəşr etməklə bazarda çox da uğurlu olmaq ehtimalı yaranmır, amma bu sahədəki boşluqları öyrənib fərqli nələrsə etmək mümkün olacaqsa, daha uğurlu olmaq olar”. 

Sərvanə Rəmixanova