Beynəlxalq iqtisadi təşkilatlarla əməkdaşlıq hər bir ölkənin iqtisadi inkişafı üçün vacib amillərdən biridir. Azərbaycan da öz iqtisadi potensialını gücləndirmək və beynəlxalq bazarlarda rəqabət qabiliyyətini artırmaq məqsədilə müxtəlif beynəlxalq iqtisadi təşkilatlarla əlaqələrini genişləndirməkdədir. 

Dünya Bankı, Beynəlxalq Valyuta Fondu, Ümumdünya Ticarət Təşkilatı və digər nüfuzlu təşkilatlarla əməkdaşlıq ölkəmizə xarici investisiyaların cəlb olunması, ticarət imkanlarının genişlənməsi və iqtisadi islahatların aparılması baxımından əhəmiyyətli üstünlüklər qazandırır. 

Mövzu ilə bağlı Valyuta.az-a danışan iqtisadçı Eldəniz Əmirov hesab edir ki,  beynəlxalq iqtisadi təşkilatlarla qurduğu əlaqə Azərbaycan dövlətinin ən uğurlu iqtisadi siyasətindən biridir:

“Azərbaycanın xarici iqtisadi diplomatiyası özünü tam mənada doğruldub. Ölkəmiz neft, daha sonra qaz, bu gün isə alternativ enerji strategiyasını uğurla həyata keçirməkdədir. Hər üç enerji strategiyasında beynəlxalq iqtisadi təşkilatlarla əlaqələr çox önəmlidir. Eyni zamanda, məhz Azərbaycan bu təşkilatlarla münasibətlərdən dolayı, beynəlxalq və regional layihələri uğurla icra etməkdədir”.

İqtisadçı vurğulayıb ki, beynəlxalq iqtisadi təşkilatların Azərbaycana qarşı qeyri-adekvat münasibət nümayiş etdirdikləri məqamlarla da rastlaşırıq: 

“Azərbaycan dövləti də məhz belə vəziyyətlərdə öz strateji maraqlarını heç bir halda qurban vermir. Dəfələrlə şahidi olmuşuq ki, ölkə maraqları bütün məqamda hər şeydən üstün tutulub və tutulmaqdadır”. 

“Hazırda beynəlxalq iqtisadi təşkilatlarla əlaqələrin gücləndirilməsi ölkə iqtisadiyyatını birbaşa təkcə iqtisadi dividentlər şəkilində deyil, eyni zamanda iqtisadiyyatın şaxələndirilməsi, komunikasiyaların gücləndirilməsi, xarici investisiyaların ölkəyə cəlb olunması, beynəlxalq tərəfdaşlığın genişləndirilməsi baxımından çox vacibdir. Çünki ölkədə qeyri-neft sektorunun inkişafında qeyd etdiyim faktorlar çox önəmlidir”, - Eldəniz Əmirov əlavə edib.

Davud