2025-ci ilin yanvar-fevral aylarında Azərbaycanın qeyri-neft sektoru üzrə ixracı 485 mln. ABŞ dolları təşkil edib.

Valyuta.Az xəbər verir ki, bu, 2024-ci ilin müvafiq dövrü ilə müqayisədə 6,6% daha çoxdu.

Məlumata əsasən, cari ilin ilk iki ayında qeyri-neft sektoru üzrə ən çox ixracın həyata keçirildiyi ölkə Rusiya Federasiyası və Türkiyə olub.  Belə ki, bu dövrdə Rusiyaya 150,8 mln. dollar, Türkiyəyə isə 82,8 mln. dollar dəyərində qeyri-neft sektoruna aid mal ixrac olunub.

İlk beşliyi isə Gürcüstan, İsveçrə və Ukrayna tamamlayıb. Bu ölkələrə ixracın miqdarı isə müvafiq olaraq 52,9 mln. dollar, 43,6 mln. dollar və 41,2 mln. dollar olub. 

2024-cü ilin müvafiq dövrü ilə müqayisədə Gürcüstan, İsveçrə və Ukraynaya ixracda artım qeydə alınsa da, Rusiya və Türkiyəyə ixracda isə azalma müşahidə olunub.

Ən çox artım İsveçrəyə ixracda baş verib. Belə ki, cari ilin ilk iki ayında İsveçrəyə ixracın miqdarı 5 dəfən çox artaraq 43.6 mln. dollara çatıb. Ötən ilin ilk iki ayında bu göstərici 7.9 mln. dollar idi. 

Ukraynaya ixrac 18.2 mln. dollardan 41.2 mln. dollara, Gürcüstana ixrac isə 42.9 mln. dollardan 52.9 mln. dollara qalxıb. 

İxracın ən çox azaldığı ölkə isə Türkiyə olub. Belə ki, ötən ilin eyni dövrü ilə müqayisədə Türkiyəyə ixrac 14.9 faiz azalaraq 82.8 mln. dollardan 97.3 mln. dollara, Rusiyaya ixrac isə 2.3 faiz azalaraq 154.4 mln. dollardan 150.8 mln. dollara düşüb.

Rəhim