Hər birimizə pul lazım olduqda yada düşən ilk yer banklardır. Banklar isə kredit verərkən bir neçə risk faktorunu önləm alır. Məsələn borc götürən şəxs vəfat etdikdə kreditin aqibəti necə olur? 

Məsələ ilə bağlı hüquqşünas Gülnar Qulizadə açıqlama verib:

"Mülki Məcəllənin tələblərinə əsasən, vəfat etmiş şəxsin öhdəliklərini əgər zamin varsa, zamin daşıyır. Əgər zamin yoxdursa, kredit götürmüş şəxsin əmlakları üzrə vərəsə varsa, həmin şəxs onun həm aktivlərini, həm də passivlərini qəbul edir. Burda aktivlər deyəndə əmlakı, passivlər deyəndə isə öhdəlikləri və kreditləri nəzərdə tutulur. Yəni, vəfat etmiş şəxsin vərəsəsi təyin olunubsa, vərəsəlik şəhadətnaməsi verilibsə, öz paylarına uyğun olaraq həmin kredit öhdəliklərini bank qarşısında daşıyırlar". 

Bəs zamin olmadıqda həmin kreditlərin aqibəti necə olur? 

"Bəzi banklar bu kimi məsələlərdə ziyana düşməmək üçün verilən krediti sığortalayırlar. Bu da müştəriyə verilən puldan çıxılır. 

Mülki Məcəllənin 558-ci maddəsinin tələbinə əsasən, şəxsin birbaşa özünün iştirakı olmadan yəni rəhmətə gedibsə, həmin öhdəlik ləğv edilir. Vərəsəlik yalnız şəxsin öz istəyi ilə təyin oluna bilər, əgər yoxdursa kreditə xitam verilir". 

Qeyd edək ki, əgər şəxs kredit öhdəliyi barəsində müqavilə bağlayıbsa, bu zaman həyat sığortası olur. Həmin müqaviləyə əsasən, şəxs vəfat edərsə, onun öhdəliklərini sığorta şirkəti daşıyır.

©Milli.Az