Əbu-Dabi şirkəti Türkiyədə bank sahibi oldu.

Valyuta.az xəbər verir ki, Türkiyənin Rəqabət Xidməti "Odeabank" üzərində nəzarətin Birləşmiş Ərəb Əmirliklərinin Əbu-Dabidə yerləşən "Abu Dhabi Developmental Holding Company" (ADQ) tərəfindən ələ keçirilməsinə yaşıl işıq yandırıb.

Belə ki, ADQ sözügedən bankın səhmlərinin 96%-ni almaq üçün "Bank Audi"nin rəhbərlik etdiyi konsorsiumla razılığa gəlib. Satışın hüquqi prosedurları artıq tamamlanıb və Rəqabət Xidmətindən icazə də alınıb.

Bu razılaşmaya əsasən, "Bank Audi" özünün 76,419%-lik payını, Avropa Yenidənqurma və İnkişaf Bankı (AYİB) 8,009%-ni, Beynəlxalq Maliyyə Korporasiyası (IFC) 6,362%-ni, IFC-yə bağlı FIG Investment Company isə 3,426%-lik payını ADQ-yə ötürəcək. Bundan əlavə, Mohammad Hassan Zeidan adlı investor da sahib olduğu 1%-lik payı satmağa razılıq verib.

Xatırladaq ki, "Odeabank" Türkiyədə fəaliyyətə 2012-ci ilin oktyabrında, Bank Tənzimləmə və Nəzarət Təşkilatından aldığı lisenziyadan sonra başlayıb. Qeyd edək ki, bank 2001-ci ildə lisenziya alıb.

Hazırda "Odeabank" ölkənin 15 şəhərində yerləşən 41 filialı ilə xidmət göstərir və təxminən 1300 nəfəri işlə təmin edir. Bu satışla birlikdə bankın sahibliyi Livan mənşəli "Bank Audi"dən BƏƏ dövlət fonduna keçir.

Sərvanə Rəmixanova