"Instagram" istifadəçiləri artıq ekranın sağ və ya sol tərəfində uzun basaraq videoları 2 dəfə sürətləndirə biləcəklər.

Valyuta.az xəbər verir ki, "TikTok"dan ilhamlanan bu yeni xüsusiyyətlə, Reels videolarını sürətləndirmək imkanı təqdim olunur.

Beləliklə, istifadəçilər artıq ekranın sağ və ya sol tərəfinə uzun basaraq videoları 2 dəfə sürətləndirə biləcəklər. Bu xüsusiyyət, izləyicilərin uzun videoları daha sürətli izləməsinə imkan yaradacaq.

"Meta" şirkətinin tərkibində olan "Instagram, Reels-i ilk dəfə təqdim edəndə videolar yalnız 15 saniyə ilə məhdudlaşırdı. Lakin "TikTok" ilə rəqabət apara bilmək üçün zamanla bu müddəti uzatdı və hazırda 3 dəqiqəyə qədər videolar paylaşıla bilir. Qısa video formatının əsas məqsədi sürətli və əyləncəli məzmun təqdim edərək izləyicini ekrana bağlamaq idi. Lakin müddətlərin uzanması ilə istifadəçilər məzmunun bəzi hissələrini atlaya və ya sürətləndirə bilmək istədilər. "TikTok" bu tələbi erkən dərk edərək video sürətləndirmə xüsusiyyətini işə saldı. "Instagram"da oxşar bir addımla istifadəçi təcrübəsini yaxşılaşdırmağı hədəfləyir.

Son illərdə qısa video formatının yayılması ilə izləyicilərin uzun məzmuna olan marağı azalmağa başladı. "Instagram"ın təqdim etdiyi sürətləndirmə seçimi, xüsusilə uzun Reels videolarının sona qədər izlənmə faizlərini artıra bilər. Lakin bəzi məzmun istehsalçıları, bu vəziyyətin izləyicinin diqqət müddətini daha da qısaltmasından narahatdırlar.

"Instagram" eyni zamanda video redaktə imkanlarını genişləndirmək üçün müstəqil bir tətbiq üzərində də çalışır. "TikTok"un məşhur redaktə aləti "CapCut"a rəqib olacaq "Edits" adlı tətbiqin bu ay istifadəyə veriləcəyi gözlənilirdi. Lakin "Meta" tətbiqin çıxışını bir daha təxirə saldı.

"Instagram"ın 2x sürətləndirmə xüsusiyyəti mərhələli şəkildə bütün istifadəçilərə təqdim olunur.