Dubayın simvoluna çevrilmiş "Burj Xəlifə" qülləsinin iki ən yüksək yaşayış mərtəbəsində yerləşən və 21 min kvadrat fut sahəyə malik dəbdəbəli "penthaus" satışa çıxarılıb. 

Valyuta.az xəbər verir ki, "Sky Palace" adlanan bu dupleks mənzil 51 milyon dollar qiyməti ilə "IDRE" şirkətindən Əsəd Xan tərəfindən təqdim olunur.

Dünyanın ən hündür binasında yerləşməsi sayəsində bu mənzil dünyanın ən yüksək yaşayış məkanlarından biri hesab olunur. Buradan Dubayın "Business Bay" bölgəsinə, Ərəb körfəzinə və səhraya qədər uzanan panoramik, maneəsiz görüntü açılır.

Layihə çərçivəsində kino zalı və iki mərtəbəli uşaq otağı kimi ideyalar da təklif edilir. Əlavə olaraq, 12 şəxsi parkinq yeri və binadakı yeganə özəl liftlə giriş imkanı da təqdim olunur. Sakinlər üçün fitnes mərkəzi, üzgüçülük hovuzları, şəxsi istirahət zonası, tennis meydançaları, restoranlar və 24 saat konsyerj xidməti kimi geniş imkanlar mövcuddur.

Bu mənzil uzun müddət boş qaldıqdan sonra 2022-ci ildə sahibkar Karl Haddad və onun tərəfdaşı tərəfindən əldə olunub. Haddad hesab edir ki, bu nadir əmlak üçün artıq doğru satış zamanıdır. Onun fikrincə, bu bina və təqdim etdiyi yaşayış təcrübəsi dünyada analoqu olmayan unikallığa malikdir.

Qeyd edək ki, "Sky Palace" ən yüksək mərtəbədə yerləşən "penthaus" olsa da, dünyanın ən bahalı penthausu statusu hələ də Londonda yerləşən və Nik Kendi adlı iş adamına məxsus 220 milyon dollarlıq mənzilə aiddir.

Sərvanə Rəmixanova