ABŞ-ın texnologiya nəhəngi “Google” süni zəka modeli olan “Gemini” üçün yeni və diqqətçəkən bir xüsusiyyət təqdim edib. 

Valyuta.az “Google”un nümayəndəsi Alex Josephin açıqlamasına istinadən xəbər verir ki, “Gemini Live” bölməsinə kamera və ekran görüntüləmə dəstəyi əlavə olunub. İndi istifadəçilər bu funksiyanı işə salaraq kameranı açıb süni zəkaya ətraflarını göstərə və müxtəlif mövzularda ondan yardım ala biləcəklər. “Google” un verdiyi məlumata əsasən, bu yeni funksiya yalnız “Google One AI Premium” abunəçiləri üçün əlçatan olacaq.

Hazırda bu xüsusiyyət hələ bütün istifadəçilər üçün tam aktiv edilməyib. "Reddit" platformasında edilən paylaşımlara əsasən, bəzi istifadəçilər artıq bu funksiyadan yararlana bilsələr də, digərləri hələ gözləmək məcburiyyətindədir. Yəni, “Gemini”nin “gözlərinin açılması” üçün istifadəçilər bir qədər də səbirli olmalıdırlar.

Sərvanə Rəmixanova