ABŞ mərkəzli texnologiya nəhəngi "Apple"ın uzun müddətdir gündəmdə olan qatlanan ekranlı smartfonu ilə bağlı diqqətçəkən bir açıqlama verilib. 

Valyuta.az xəbər verir ki, bu barədə "Bloomberg"in jurnalisti Mark Qurman cihazın nə zaman təqdim olunacağına dair önəmli məlumat paylaşıb.

Mark Qurmanın sözlərinə görə "Apple"ın qatlanan ekranlı “iPhone”u böyük ehtimalla "Samsung Galaxy Z Fold" seriyasına rəqib olacaq. Yəni cihaz üfüqi istiqamətdə qatlanacaq. Əvvəlki məlumatlar bu modelin "iPhone Fold" adı ilə təqdim edilə biləcəyini və indiyədək istehsal edilən ən bahalı “iPhone” olacağını göstərirdi. İddialara əsasən, cihazın qiyməti təxminən 2300 ABŞ dolları civarında olacaq. 

Mark Qurmana görə, "Apple" qatlanan ekranlı “iPhone” modelini gələn il – yəni 2026-cı ildə təqdim edəcək. Əgər planlamada hər hansı dəyişiklik baş verməzsə, bu tarix "Apple"ın qatlanan ekranlı ilk “iPhone” modeli ilə tanış olduğumuz il kimi tarixə düşəcək.

Hazırda "Apple" bu cihazla bağlı heç bir rəsmi açıqlama verməyib.

Sərvanə Rəmixanova