"Apple" şirkəti "Apple Intelligence" xüsusiyyətlərinə görə yalançı reklam ittihamı ilə məhkəməyə verilib.

Valyuta.az xəbər verir ki, ABŞ-da bir qrup istehlakçı "Apple" şirkətini "Apple Intelligence" funksiyalarını aldadıcı reklamla təbliğ etməkdə ittiham edərək məhkəməyə müraciət edib. Şikayətçilərin sözlərinə görə, şirkət yay aylarında internet və televiziya vasitəsilə geniş reklam kampaniyaları apararaq bu funksiyaların dərhal əlçatan olacağı təəssüratını yaradıb. Lakin funksiyaların gecikməsi alıcılarda narazılıq doğurub.

"Apple Intelligence" xüsusiyyətləri "Siri", "Image Playground", "Genmoji" kimi yenilikləri əhatə edir və "iPhone 16" modellərinin əsas təqdimat mövzusu olub. 

Şikayətçilər bildirirlər ki, "Apple" bu xüsusiyyətləri təbliğ etməklə insanları bahalı cihazlar almağa həvəsləndirib, lakin həmin funksiyaların təqdim olunmaması maddi və mənəvi zərərə səbəb olub. Onlar San-Xose bölgə məhkəməsində maddi kompensasiya tələb edirlər.

Məlumata görə məhkəmə prosesinə Klarkson Hüquq Firması rəhbərlik edir. Düşünülür ki, bu iş "Apple"ın süni intellekt sahəsində yaşadığı çətinlikləri üzə çıxarır. Şirkət məsələ ilə bağlı hələlik rəsmi açıqlama yaymayıb.

Sərvanə Rəmixanova