Karyera yolunda atılan addımlar insanın özünü kəşf etməsinə, bacarıqlarını inkişaf etdirməsinə və yeni imkanlar əldə etməsinə yardım edir. Lakin bəzən qurulan karyera sadalananları etmir və insanlar illərlə əziyyət çəkdiyi, öyrəndiyi işi buraxa bilmir. Hansı nöqtədə karyeramızdan əl çəkməyi bacarmalıyıq? Karyeramızı dəyişdirməli olduğumuzu necə anlayaq?

İnsan resurslarının idarə edilməsi üzrə mütəxəssis, təlimçi Xəyyam Əsgərov Valyuta.az-a bildirdi ki, karyera anlamını anlamaq vacibdir: “İlk karyeranın nə olduğunu müəyyən edək. Karyera bir insanın peşəkar fəaliyyətində mərhələli şəkildə inkişafıdır. Yəni, onun gəlirlərinin, vəzifəsinin, biliklərinin pillə-pillə artmasıdır. Düşünürəm ki, Azərbaycan şəraitində karyeranın ilk pilləsi 6-7-ci sinifdən ixtisas seçimindən başlanır. Burada karyeranın yaranıb formalaşmasına uşağın özünün həvəsi, marağı və qabiliyyəti təsir edir. Həmçinin uşağın yaxın çevrəsindəki insanların onun gələcək karyerasına və gələcək fəaliyyətinə təsir faktoru mövcuddur”.

Sadəcə əməkhaqqı düşünmək karyeranıza xələl gətirəcək 

Mütəxəssis deyir ki, karyeranın ikinci pilləsi universitet zamanı formalaşır: “Kim ali təhsil almırsa, orta ixtisas və ya peşəyə yiyələnərək bu zaman içərisində karyera istiqamətini seçə bilir. Karyeranı seçdikdən sonra həmin sahənin inkişaf etdirilməsi, əmək haqqı, bacarıqlar karyeranı inkişaf etdirən amillərə çevrilir. Tövsiyəm budur ki, gənclər bir istiqaməti seçərək addımlasınlar. Gənclərin etdiyi səhvlərdən biri o odur ki, universitet və ya orta məktəbi bitirdikdən sonra sadəcə pula, əməkhaqqıya baxaraq əlaqəsiz fəaliyyət növlərini seçirlər. Sonradan vaxtaşırı işlədikləri yeri dəyişdirmək məcburiyyətində qalırlar. Sadəcə ödənişi fikirləşməklə karyeralarına xələl gətirmiş olurlar. Bu səhv müəyyən yaşdan sonra həyatlarında təsirini göstərir. Yəni, iş tapmaqda çətinlik çəkirlər. Məsələn, 40 yaşlı biri geriyə baxanda karyera xətti çoxşaxəli olduğu üçün eyni karyera üzrə inkişafı mümkünsüz olur”. 

Karyeranız haqqında özünüzlə danışın

X.Əsgərov qeyd etdi ki, karyeradan razı qalıb-qalmadığınızı yoxlayın: “Karyeranı dəyişdirməli olub-olmadığımızı anlamaq üçün özümüzə bir neçə sual verməliyik.Gördüyüm işdən zövq alırammı? Gördüyüm işdən aldığım əmək haqqı mənim fərqli tipik xərclərimi qarşılaya bilirmi? Ümumiyyətlə, işimi bilir və bacarırammı? Seçdiyim iş mənim dəyərlərimə uyğundurmu? Bu suallara cavab verərək, karyeranı dəyişdirməklə bağlı fikirlərə aydınlıq gətirmək olar. Əlbəttə karyera xəttini dəyişdirmək mümkündür, hətta bunun yaşla cox da əlaqəsi yoxdur. Amma əlaqəsi olan istiqamətlər də var. Məsələn, fiziki məhdudiyyət karyera dəyişimində zamanla özünü göstərə bilər”.

Sərvanə Rəmixanova