1985-ci ildə internet hələ formalaşma mərhələsində olarkən "Symbolics Computer Corporation" adlı bir şirkət dünyanın ilk .com domenini -  Symbolics.com-u qeydiyyatdan keçirib.

Bugün bir domen adı əldə etmək saniyələr içində tamamlanan bir proses olsa da, o dövrdə bu, mürəkkəb və uzun bir prosedur tələb edirdi. İnternetin hələ geniş yayılmadığı bir dövrdə bir şirkətin belə bir addım atması olduqca irəlini görən bir yanaşma hesab olunurdu.

1985-ci ildə internet və domen qeydiyyatı

Valyuta.az xəbər verir ki, o dövrdə "World Wide Web" (WWW) hələ mövcud deyildi və internet əsasən universitetlər və tədqiqat institutları arasında məlumat mübadiləsi üçün istifadə olunurdu. "Symbolics" şirkətinin sahibləri Stanford Universitetinə müraciət edərək, DOS ekranına bənzəyən ilkin internet mühitində öz domenlərini qeydiyyatdan keçirmək üçün mürəkkəb prosedurlardan keçiblər.

Alan Adı Sistemi (DNS) hələ inkişaf mərhələsində olub və domen qeydiyyatları Stanford Araşdırma İnstitutu (SRI) tərəfindən əl ilə idarə edilib. "Symbolics" şirkəti uzun faks yazışmaları və sənəd mübadiləsindən sonra dünyanın ilk .com domeninə sahib olub.

Symbolics.com-un sahibi kim idi?

"Symbolics Computer Corporation" Massaçusets ştatının Kembric şəhərində yerləşən bir şirkət idi və "Lisp" maşınlarının hazırlanmasında ixtisaslaşmışdı. "Lisp" maşınları "Lisp" proqramlaşdırma dili ilə işləyən ilk ümumi məqsədli kompüterlərdən biri idi və əsasən süni intellekt tədqiqatları üçün istifadə olunurdu.

Şirkət bağlandı, sayt hələ də aktivdir

"Symbolics" öz proqramlarını inkişaf etdirmək üçün domen adından istifadə etsə də, onlayn mağaza və ya ticarət platforması yaratmamışdı, çünki həmin dövrdə onlayn alış-veriş anlayışı mövcud deyildi. Sonradan şirkət fəaliyyətini dayandırıb və Symbolics.com başqa bir sahib tərəfindən satın alınıb.

Bu gün domen hələ də aktivdir, lakin içində şirkətin ilkin məqsədi ilə əlaqəsi olmayan müxtəlif məzmunlar yerləşdirilib. Dünyanın ilk .com domeni olsa da, artıq yalnız tarixi bir fakt və texnologiya dünyasının maraqlı bir parçası kimi varlığını davam etdirir.

Paşa Məmmədli