“Unibank” Kommersiya Bankı Açıq Səhmdar Cəmiyyəti 2024-cü il IV rüb üzrə maliyyə hesabatını açıqlayıb.

Valyuta.Az açıqlanan hesabata istinadən xəbər verir ki, bankın mənfəəti sözügedən dövrdə 12 mln. manatdan çox azalaraq 20 mln. 400 min manata düşüb. Qeyd edək ki, 2023-cü ilin müvafiq dövründə bu rəqəm 32 mln. 931 min manat olub. 

Bankın faiz xərcləri 7 mln. manata yaxın, qeyri-faiz xərcləri isə 42 mln. manata yaxın artıb. Belə ki, faiz xərcləri 78 mln. 136 min manat, qeyri-faiz xərcləri isə 207 mln. 564 min manat təşkil edib. 2023-cü ilin müvafiq dövründə isə bu rəqəmlər müvafiq olaraq 71 mln. 776 min manat və 165 mln. 129 min manat olub. 

"Unibank"ın banklar və digər maliyyə institutlarındakı depozitləri isə 4 dəfədən çox azalaraq  29 mln. 476 min manata düşüb. Xatırladaq ki, əvvəlki ilin eyni dövründə bu rəqəm 125 mln. 72 min manat idi. 

Sözügedən dövrdə bankdakı depozitlərin miqdarında da azalma qeydə alınıb. 2023-cü ili 1 mlrd. 215 mln. 892 min manat depozitlə başa vuran bank, 2024-cü ilin mvafiq dövrünü 1 mlrd. 204 mln. 660 min manatla başa vurub.       

Fiziki şəxslərin depozitlərində artım qeydə alınsa da, hüquqi şəxslərin depozitlərində isə azalma müşahidə olunub. Fiziki şəxslərin depozitləri əvvəlki ilin müvafiq dövrü ilə müqayisədə 941 mln. 280 min manatdan 956 mln. 429 manata yüksəlsə də, hüquqi şəxslərin depoziti 274 mln. 612 min manatdan 248 mln. 231 min manata düşüb.

Bankın vergi öhdəlikləri də 4,6 mln. manatdan 7 mln. 43 min manata yüksəlib.       

Ümumilikdə isə bankın öhdəlikləri ötən ilin eyni dövrü ilə müqayisədə 150 mln. manatdan çox artaraq 1 mlrd. 441 mln. 830 min manatdan 1 mlrd. 592 mln. 697 min manata yüksəlib.

Rəhim