"Apple" şirkətinin həmtəsisçisi Stiv Cobs işə qəbul prosesində tətbiq etdiyi qeyri-adi üsullarla tanınıb. Onun məşhur "pivə testi" adlandırılan metodu isə bu baxımdan xüsusilə diqqətçəkən olub. Onsuz da kifayət qədər gərgin keçən iş görüşmələri hazırlıq, həyəcan və gözlənilməz suallarla mübarizə tələb etdiyi üçün Cobs namizədləri daha rahat mühitdə qiymətləndirmək qərarına gəlib.

Valyuta.az xəbər verir ki, Cobsun tətbiq etdiyi "pivə testi"nin məqsədi namizədlərlə səmimi şəraitdə ünsiyyət qurmaq olub. İddialara görə, o, "Apple"da işə qəbul prosesində iştirak edən şəxsləri içki içməyə dəvət edərək belə bir mühit formalaşdırıb. Onun üçün əsas məsələ bu idi: "Bu insanla pivə içə bilərdimmi? Onunla gəzintidə rahat söhbət edə bilərdimmi?".

Bu qeyri-rəsmi görüşlər zamanı Cobs namizədlərə "Sonuncu dəfə nə vaxt nəyəsə nail oldunuz?" və ya “Keçən yay nə etmisiniz?” kimi açıq suallar ünvanlayıb. Bu sualların konkret düzgün və ya səhv cavabları olmayıb. Məqsəd namizədi daha yaxından tanımaq və onun şirkət mədəniyyətinə uyğun olub-olmadığını müəyyənləşdirmək olub. Rəsmi atmosferin olmadığı bu şəraitdə belə, Cobs yenə də ən yaxşı mütəxəssisləri – onun ifadəsi ilə desək, “A oyunçularını” seçməyə üstünlük verib.

Bu yanaşma barədə Cobs belə demişdi: "Kifayət qədər "A oyunçusunu" bir araya topladığınız zaman onların bir yerdə işləməkdən necə zövq aldıqlarını görürsünüz. Çünki əvvəllər belə bir imkanları olmayıb".

Görünür, işə qəbul mütəxəssisləri düzgün namizədləri tapmaq üçün müxtəlif üsullardan istifadə edirlər. Onlardan biri də "su testi" adlanır.

"Su testi" barədə hekayə "Reddit" platformasında istifadəçilərdən birinin işə qəbul mütəxəssislərinə tətbiq etdikləri "xüsusi testləri" soruşması zamanı üzə çıxıb. Bir iştirakçı müsahibə zamanı bu testə məruz qaldığını bildirib və görüş otağına bir sürahi və stəkan su qoyularaq namizədin necə davrandığının izlənildiyini qeyd edib.

Həmin şəxs işə qəbul mütəxəssisinin sürahidən su istifadəsini müşahidə edərək potensial əməkdaşlarda nə axtardığını belə izah edib: “Müsahibə zamanı suyu "normal sürətlə" içən yeganə şəxs mən idim və bu hal "iş mühitində özünə inam, təklif edilən bir şeyi qəbul etmə bacarığı" kimi qiymətləndirilirdi".

"Reddit" istifadəçisi öz "normal sürətinin" hər sualı cavabladıqdan sonra bir qurtum su içmək olduğunu və bunun özünü rahatlaşdırmaq üçün etdiyini bildirib. Sonda isə əlavə edib: “Görünür, hətta kimsənin su təklifini necə rədd etməsindən və ya suyu çox sürətlə içməsindən belə onun haqqında çox şey öyrənmək mümkündür".

Paşa Məmmədli