Rusiya-Ukrayna müharibəsindən sonra Ukrayna iqtisadiyyatının yenidən qurulması üçün tələb olunan məbləğ 524 milyard dollara yüksəlib. Bu, ölkənin 2024-cü il üçün gözlənilən iqtisadi istehsalının demək olar ki, üç qatına bərabərdir. 

Valyuta.Az xəbər verir ki, bu qiymətləndirmə "Dünya Bankı", Birləşmiş Millətlər Təşkilatı, Avropa Komissiyası və Ukrayna hökumətinin birgə hesabatında əks olunub.  

Aparılan yeni araşdırmaya görə, üç il əvvəl başlayan Rusiya işğalından 2023-cü ilin 31 dekabr tarixinədək olan dövrü əhatə edən məlumatlar Ukraynanın enerji infrastrukturuna dəyən ziyanın 70% artdığını göstərir.  

Son qiymətləndirmə bir il əvvəl aparılmış 486 milyard dollarlıq hesablamadan 7%-dən çox artım olduğunu ortaya qoyur. Ən çox zərər görən sahələr mənzil, nəqliyyat, enerji, ticarət və təhsil sektorları olub.  

Mütəxəssislər bu hesabatda binalar və digər infrastruktur obyektlərinə dəyən birbaşa fiziki ziyanı, insanların həyatına və yaşayış səviyyəsinə təsiri, eləcə də "daha yaxşı bərpa" üçün tələb olunan xərcləri müəyyən ediblər.  

ABŞ Donald Tramp müharibəyə son qoymaq üçün Rusiya və Ukrayna ilə ayrıca danışıqlar aparmaq niyyətindədir. O, Fransa prezidenti Emmanuel Makron ilə görüşü zamanı jurnalistlərə verdiyi açıqlamada razılaşmanın bir neçə həftə ərzində əldə oluna biləcəyini bildirib.  

"Son bir ildə Ukraynanın bərpa ehtiyacları Rusiyanın davam edən hücumları səbəbindən artmağa davam edir", – Ukraynanın baş naziri Denis Şmıqal bəyan edib.  

Ukrayna hökuməti donor dəstəyi ilə 2025-ci il üçün prioritet ehtiyacların qarşılanmasına 7,37 milyard dollar ayırıb. Lakin hələ də təxminən 10 milyard dollarlıq maliyyə boşluğu mövcuddur.  

Son qiymətləndirməyə əsasən, Rusiyanın hücumları nəticəsində Ukraynada birbaşa dəymiş ziyan 2024-cü ilin fevralında qeydə alınmış 152 milyard dollardan 176 milyard dollara yüksəlib.  

Ölkənin ümumi mənzil fondunun təxminən 13%-i zədələnib və ya tamamilə məhv edilib. Bu isə 2,5 milyondan çox ailəyə təsir edib.  

Hesabatda son bir ildə enerji sektoruna dəyən ziyanın 70% artdığı qeyd olunub. Buraya enerji istehsalı, ötürülməsi, paylanması infrastrukturu və istilik sistemləri daxildir.  

Uzunmüddətli bərpa ehtiyaclarının 84 milyard dolları mənzil sektoruna, 78 milyard dolları nəqliyyata, 68 milyard dolları enerji və mədən sənayesinə, 64 milyard dolları ticarət və sənayeyə, 55 milyard dolları isə kənd təsərrüfatına aid edilib.  

Təkcə dağıntıların təmizlənməsi və idarə edilməsi üçün lazım olan məbləğ 13 milyard dollar səviyyəsində qiymətləndirilib.  

"Dünya Bankı"nın Avropa və Mərkəzi Asiya üzrə vitse-prezidenti Antonella Bassani bu qiymətləndirmənin Ukraynanın fiziki və iqtisadi bərpa, islahatlar və yenidənqurma sahəsində əldə etdiyi irəliləyişi göstərdiyini vurğulayıb.  

Bundan əlavə, Ukraynanın tərəfdaşlarının və özəl sektorun dəstəyi ilə artıq qarşılanmış 13 milyard dollardan çox ehtiyac hesabatda nəzərə alınmayıb. Buraya dövlət büdcəsi və donor fondlarından mənzil ehtiyacları üçün ayrılmış 1,2 milyard dollar və 2 000 km-dən çox təcili yol təmiri daxildir.  

Rəhim