"Apple" qarşıdakı dörd il ərzində ABŞ-də 500 milyard dollarlıq yatırım edəcəyini elan edib. 

Valyuta.Az "Euronews"a istinadən xəbər verir ki, bu addım, "Apple"ın baş icraçı direktoru Tim Kukun (Tim Cook) ötən həftə ABŞ Prezidenti Donald Tramp (Donald Trump) ilə görüşdüyünə dair xəbərlərin yayılmasından sonra atılıb.  

Şirkətin xərcləyəcəyi 500 milyard dollar yerli tədarükçülərdən ediləcək alışlardan tutmuş, "Apple TV+" xidməti üçün ABŞ-də çəkiləcək serial və filmlərə qədər bir çox sahəni əhatə edəcək.  

Lakin "Apple" bu məbləğin nə qədərinin artıq ABŞ-dəki tədarükçülərinə ayrıldığını açıqlamayıb. Şirkətin tədarükçüləri arasında Kentukkidə "iPhone" üçün şüşə istehsal edən "Corning" kimi firmalar da var.  

Çində istehsal edilən "Apple" məhsulları Trampın bu ayın əvvəlində tətbiq etdiyi 10 faiz dərəcəli gömrük rüsumlarına məruz qala bilər. Lakin "Apple", Trampın ilk prezidentlik dövründə Çin rüsumlarından bəzi güzəştlər əldə etmişdi. Şirkət 2018-ci ildə də oxşar açıqlama verərək, yeni və davam edən yatırımları ilə ABŞ iqtisadiyyatına beş il ərzində 350 milyard dollar töhfə verəcəyini bildirmişdi.  

Xəbərin ardından "Apple" səhmləri birjada açılışdan əvvəlki ticarət əməliyyatlarında cüzi eniş yaşayıb. Tramp isə "Truth Social" platformasında paylaşım edərək "Apple"a və Tim Kuka təşəkkür edib, bu addımın şirkətin onun rəhbərliyinə inamını göstərdiyini bildirib.  

"Apple"ın istehlakçı məhsullarının əksəriyyəti ABŞ-dən kənarda yığılır. Bununla belə, "Broadcom", "SkyWorks Solutions" və "Qorovo" kimi ABŞ mərkəzli şirkətlər "Apple" üçün çip istehsal etməyə davam edir.

Şirkət ötən ay Tayvan mərkəzli çip istehsalçısı "TSMC"yə məxsus Arizonadakı bir fabrikdə öz dizayn etdiyi çiplərin kütləvi istehsalına başladığını elan edib. Trampın ilk prezidentlik dövründə "TSMC"ni Arizonaya cəlb etmək və ABŞ-də yarımkeçirici istehsalını təşviq edən CHIPS Qanununu həyata keçirmək sənaye siyasəti baxımından ən böyük addımlardan biri olmuşdu.  

"Apple", "Foxconn" (rəsmi adı ilə "Hon Hai Precision Industry") ilə əməkdaşlıq edərək Hyustonda 250 min kvadratmetrlik bir müəssisə tikəcəyini və burada məlumat mərkəzlərində istifadə olunacaq süni intellekt serverlərinin yığılacağını açıqlayıb.  

Bu serverlər hazırda ABŞ-dən kənarda istehsal edilir.  

Bundan əlavə, şirkət "Genişləndirilmiş İstehsal Fondu"nu 5 milyard dollardan 10 milyard dollara qədər artıracağını elan edib.  

Son olaraq, "Apple" Miçiqanda bir istehsal akademiyası açacağını açıqlayıb.  

Bu akademiyada "Apple" mühəndisləri və yerli universitetlərin heyəti kiçik və orta ölçülü istehsalat firmalarına layihə idarəetməsi və istehsal proseslərinin optimallaşdırılması kimi sahələrdə pulsuz təlimlər keçəcək.  

Rəhim