Nigeriya hökuməti kriptovalyuta birjası "Binance"i ölkədə fəaliyyət göstərməsi nəticəsində yaranan 79,5 milyard dollar iqtisadi itkinin və 2 milyard dollar dəyərində vergi borcunun ödənilməsinə məcbur etmək üçün məhkəməyə müraciət edib. 

Valyuta.Az "Reuters"ə istinadla xəbər verir ki, bu barədə çərşənbə günü yayımlanan məhkəmə sənədlərində qeyd olunub.  

Rəsmilər dünyanın ən böyük kriptovalyuta birjası olan "Binance"i Nigeriya nairasının dəyərsizləşməsində günahlandırır. 2024-cü ildə ölkədə kriptovalyuta ticarət platformalarının nairanın əsas mübadilə vasitəsinə çevrilməsindən sonra hökumət "Binance"in iki rəhbər şəxsini saxlayıb.  

Nigeriyada rəsmi qeydiyyatdan keçməyən "Binance" məsələ ilə bağlı dərhal açıqlama verməyib. Lakin şirkət əvvəllər Nigeriyanın Federal Daxili Gəlirlər Xidməti ("FIRS") ilə keçmiş vergi öhdəliklərini həll etmək üçün əməkdaşlıq etdiyini bildirmişdi.  

"Reuters" agentliyinin əldə etdiyi sənədlərə görə, daxili gəlirlər xidməti "Binance"in Nigeriyada "əhəmiyyətli iqtisadi mövcudluğa" malik olduğunu və buna görə də korporativ gəlir vergisini ödəməli olduğunu iddia edir. Məhkəməyə təqdim olunan sənədlərdə 2022 və 2023-cü illər üzrə gəlir vergisinin ödənilməsi, eləcə də borcun ödənilmədiyi məbləğin üzərinə illik 10% cərimə tətbiq edilməsi tələb olunur.  

Bundan əlavə, "FIRS" ödənilməmiş vergilər üçün Nigeriya Mərkəzi Bankının kredit faiz dərəcəsinə əsasən 26,75% faiz tətbiq edilməsini istəyir.  

Ötən il hökumətin bu sahəyə nəzarəti gücləndirməsindən sonra "Binance" Nigeriyada vergi ödəməkdən yayınmaqla bağlı dörd maddə üzrə ittiham olunmuşdu.  

İttihamlar arasında əlavə dəyər vergisinin və şirkət gəlir vergisinin ödənilməməsi, vergi bəyannamələrinin təqdim edilməməsi və müştərilərə platforma vasitəsilə vergidən yayınmaqda kömək göstərilməsi yer alır.  

"Binance" ittihamları rədd edərək onlarla mübarizə aparacağını bildirib. Şirkət 2023-cü ilin mart ayında naira ilə bütün əməliyyatları və ticarəti dayandırdığını elan etmişdi.  

Bundan əlavə, "Binance" Nigeriyanın korrupsiya ilə mübarizə agentliyi tərəfindən irəli sürülən çirkli pulların yuyulması ittihamları ilə də üzləşir. Şirkət bu ittihamları da təkzib edib.  

Rəhim