ABŞ-da istifadəyə verilən "Protector" adlı yeni mobil tətbiq istifadəçilərə "Uber" kimi bir sistemlə silahlı mühafizəçi çağırmaq imkanı yaradır.

Valyuta.az xəbər verir ki, həm aktiv, həm də təqaüddə olan hərbçi və polis əməkdaşlarından ibarət mühafizəçilər gündəlik və ya uzunmüddətli olaraq icarəyə götürülə bilər.

Tətbiq hazırda Nyu-York və Los-Anceles şəhərlərində fəaliyyət göstərir və yalnız "Apple App Store" üzərindən yüklənə bilir. İstifadəçilər mühafizəçini seçdikdən sonra onlara əlavə avadanlıqlar təqdim edə və ya bu avadanlıqları tətbiq üzərindən icarəyə götürə bilərlər. Eyni zamanda, mühafizəçilər üçün xüsusi geyim seçmək də mümkündür.

Mühafizəçilər xidmətə öz şəxsi silahları ilə gəlirlər. Tətbiqin yaradıcıları bu sistemin insanların təhlükəsizliyini artıracağını bildirirlər. Son vaxtlar ABŞ-da, xüsusilə də yüksək vəzifəli şəxslərə qarşı silahlı hücumların artması, belə bir xidmətə olan tələbatı gündəmə gətirib.

Tətbiqin təqdim etdiyi xidmət ciddi müzakirələrə səbəb olub. Bəzi mütəxəssislər, bu cür bir sistemin təhlükəsizlik məsələlərini həll etmək əvəzinə, daha çox risk yaradacağını düşünürlər. Digər tərəfdən, bu tətbiqin təkcə həqiqi təhlükəsizlik ehtiyacı olan şəxslər üçün deyil, eyni zamanda sosial mediada diqqət çəkmək istəyən məşhurlar və "TikTok" istifadəçiləri üçün də yeni bir trenda çevriləcəyi proqnozlaşdırılır.

Bir müddət əvvəl Nyu-Yorkda "UnitedHealthcare" şirkətinin baş direktoru silahlı hücum nəticəsində həyatını itirmişdi. Bu kimi hadisələr fonunda, "Protector" şirkəti tətbiqi həyat qurtaran bir həll yolu kimi təqdim edir. Lakin bu cür xidmətlərin hüquqi və etik tərəfləri hələ də müzakirə mövzusudur.

Paşa Məmmədli