Böyük marketlərdə bir çox məhsulların öz temperaturuna uyğun vitrinlərdə yığıldığını görürük. Lakin kiçik, əsasən də məhəllə marketlərində vəziyyət bir qədər fərqlidir. Belə ki, bəzi qida məhsulları var ki, onların özlərinə uyğun şəraitdə saxlanılması vacibdir. Amma kiçik marketlərdə bunu görə bilmirik.

Sağlam qidalanma mütəxəssisi Məhsəti Hüseynova bildirdi ki, bəzi  məhsullar xüsusi yüksək risk qrupuna aid olur: “Ət və ət məhsulları, süd və süd məhsulları, zülal tərkibli qidalar  və sairlərin saxlanmasında temperatur əhəmiyyətli rol oynayır. Əgər düzgün saxlanılma şərtlərinə əməl olunmasa, həmin qidaların tərkibində ciddi dəyişiklik baş verir. Bunlar da zəhərlənməyə səbəb olmaqla yanaşı, bir çox sağlamlıq problemlərinə gətirib çıxarır. Xüsusilə bu hallar marketlərdə satılan məhsullarda da özünü göstərir və bu adətən kiçik məhəllə marketlərində daha çox olur”.

Düzgün saxlanılmayan qida bakteriya yuvasına dönür

Mütəxəssis bildirdi ki, qida məhsullarının qeyri-qida məhsulları ilə birlikdə saxlanılması da bəzən problem yarada bilir: "Xüsusilə də yuyucu tozlarını (bəzən daha çox qatqı maddəsi olan zərərli kimyəvi maddələrdən istifadə edilir) qidalarla yanaşı saxladıqda, həmin maddələr qidanın tərkibinə də nüfuz edə bilir. Belə olduğu halda qidanın tərkibi dəyişir, keyfiyyəti aşağı düşür və sağlamlığa zərər vurur. Eyni zamanda düzgün şəkildə saxlanılmayan qidaların tərkibində bakteriyalar daha sürətlə artır. Əsasən heyvan mənşəli qidalarda mikrobların sürətlə çoxalması baş verir ki bu da qidanın xarab olmasına və istifadə edildikdə orqanizmə ciddi ziyan vurmasına, zəhərlənməyə səbəb ola bilir".

"Bəzən elə olur ki, elektrik enerjisinə qənaət etmək məqsədilə soyuducuları müəyyən bir vaxtda elektrikdən ayırırlar. Bu zaman məhsul temperatur dəyişikliyinə məruz qalır və həmin qidanın tərkibi pozulmağa başlayır və daha sonra dondurulduqda alıcılar bundan xəbər tutmur. İstifadə etdikdə isə artıq öz zərərlərini göstərir. Yanlış saxlanılma ət məhsullarında salmonella kimi zərərli və digər bakteriyaların yaranmasına səbəb olur" - deyə mütəxəssis bildirdi.

Mal qonşuluğu prinsipi qorunmalıdır

Qida mütəxəssisi düşünür ki, qidalarda mal qonşuluğu prinsipi qorunmadıqda bir çox fəsadlar ortaya çıxa bilər: “Mal qonşuluğu prinsipi pozulan qidalar - çiy məhsullar, açıq kəsilmiş ətlər və.s bu kimi məshulların birlikdə saxlanılması hər iki məhsulun keyfiyyətinin pozulmasına, xarab olmasına gətirib çıxarır. Xüsusilə paketlənmiş qablaşdırılmış məhsullar üzərlərində son istifadə müddəti göstərilsə də, düzgün şəkildə saxlanılmırsa, bu məhsullar son istifadə müddəti bitməmiş keyfiyyəti aşağı düşür və məhsulları almaq  təhlükəli hesab olunur. Yaxşı olar ki, bütün məhsulları alarkən güvənli markaya sahib olan məhsulu almaqla yanaşı, həm də satış yerində həmin məhsulun özünə uyğun şəkildə saxlanıldığına diqqət edək. 

Sərvanə Rəmixanova