"Arabika" qəhvəsinin fyuçerslərinin 2025-ci ilin sonuna qədər təxminən 30% azalacağı proqnozlaşdırılır. Son vaxtlar qeydə alınan rekord qiymətlərin tələbi azaldacağı və 2026-cı il üçün Braziliyada bol məhsul olacağına dair ilkin əlamətlərin müşahidə edildiyi bildirilir.

Valyuta.Az xəbər verir ki, bu proqnozlar "Reuters" agentliyinin keçirdiyi sorğuda öz əksini tapıb.

Sorğunun nəticələrinə görə, "Arabika" qəhvəsinin 2025-ci ilin sonuna olan qiymət proqnozu bir funt üçün 2,95 dollar olub ki, bu da çərşənbə günü qeydə alınan bağlanış qiymətindən 30%, 2024-cü ilin sonundakı qiymətdən isə 6% aşağıdır.  

"Tələbin çox yüksək qiymətlərə cavab olaraq sabit qalacağı gözlənilir", – sorğuda iştirak edən 12 treyder və analitikdən biri bildirib.  

Qiymət artımına 2025/26 mövsümündə dünyanın ən iri "Arabika" qəhvəsi istehsalçısı Braziliyada daha kiçik məhsul olacağına dair gözləntilər səbəb olub.  

Sorğunun median nəticələrinə əsasən, Braziliyanın 2025/26 mövsümündə "Arabika" qəhvəsi istehsalının 40,55 milyon kisə olacağı proqnozlaşdırılır ki, bu da əvvəlki mövsümdə qeydə alınan 43,4 milyon kisədən aşağıdır.  

Bununla belə, bir neçə iştirakçı 2026/27 mövsümündə daha böyük məhsul olma ehtimalını vurğulayıb.  

"Əgər şaxta və ya yağış dövrünü zərər görmədən keçə bilsək, 2026/27 mövsümündə Braziliyada rekord məhsul gözlənilə bilər", – digər iştirakçı qeyd edib.  

"Arabika" qəhvəsinin qiymətləri 2024-cü ildə ən yaxşı nəticə göstərən əmtəə bazarlarından biri olub və təxminən 70% artıb. Bu il də artım davam edərək 11 fevralda bir funt üçün 4,2995 dollarla tarixi maksimuma çatıb.  

Braziliyanın ümumi qəhvə istehsalının 2024/25 mövsümündə 66,4 milyon kisədən 64,6 milyon kisəyə düşəcəyi proqnozlaşdırılır. Lakin "robusta" (konillon) qəhvəsinin istehsalının artması "arabika"dakı azalmanı qismən kompensasiya edə bilər.  

"Robusta" qəhvəsinin qiymətlərinin 2025-ci ilin sonuna qədər metrik ton üçün 4 200 dollara düşəcəyi və çərşənbə günü bağlanış qiymətindən 28%, illik isə 14% aşağı olacağı gözlənilir.  

Braziliyanın "Robusta" qəhvəsi istehsalının 2025/26 mövsümündə 21 milyon kisədən 24,5 milyon kisəyə yüksələcəyi proqnozlaşdırılır.  

Dünyanın ən böyük "robusta" istehsalçısı Vyetnamda da məhsulun 2024/25 mövsümündə 28 milyon kisədən 29 milyon kisəyə yüksələcəyi gözlənilir.  

"Əgər hava şəraiti Vyetnamda əlverişli qalsa, fermerlərin son illərdə etdiyi sərmayələr sayəsində istehsalın bərpa olunacağını gözləyirik", – sorğuda iştirak edənlərdən biri bildirib.  

Rəhim