Qızıl, ABŞ-Çin ticarət müharibəsinin yaratdığı qeyri-müəyyənlik fonunda təhlükəsiz liman tələbini artıraraq təxminən 1% bahalaşıb və rekord səviyyəyə yüksəlib.

Külçə qızıl çərşənbə günü bir unsiya üçün 2 849,05 dollara çataraq bütün zamanların ən yüksək göstəricisini qeydə alıb. Bu artım, ABŞ prezidenti Donald Trampın bir gün əvvəl Çin idxalına 10%-lik gömrük rüsumu tətbiq etməsi və Pekinin buna sürətli reaksiya verməsinin ardınca baş verib.

Çinin cavabı Trampın ilk prezidentlik dönəmi ilə müqayisədə daha yumşaq olsa da, dünyanın iki ən böyük iqtisadiyyatı arasındakı gərginliyin bazarlara təsiri ilə bağlı narahatlıqlar davam edir. İnvestorlar gömrük tariflərinin inflyasiyanı artıracağı təqdirdə ABŞ-nin pul siyasətində dəyişikliklərə səbəb olub-olmayacağını diqqətlə izləyir.

"Saxo Capital Markets"in strateqi Çaru Çanana (Charu Chanana), "Bu şəraitdə təhlükəsiz limandan kim imtina edər ki? ABŞ-Çin danışıqları ilə bağlı müsbət xəbərin olmaması və Qəzzə ilə bağlı artan geosiyasi gərginlik, ABŞ dollarının hansı istiqamətə getməsindən asılı olmayaraq, qızıla daha çox dəstək verəcək", – deyə bildirib.

Sinqapur vaxtı ilə saat 09:17-də spot qızılın qiyməti 0,1% artaraq bir unsiya üçün 2 844,82 dollara yüksəlib. "Bloomberg Dollar Spot" indeksi çərşənbə axşamı 0,7%-lik geriləmənin ardından 0,1% azalıb. Gümüş və palladium ucuzlaşıb, platin isə cüzi bahalaşıb.