Yaxın günlərdə Dünya Bankı ilə Azərbaycan hökuməti arasında məşğulluğun dəstəklənməsi ilə bağlı layihənin (AESP) əlavə maliyyələşdirilməsi üzrə saziş imzalanacaq.

Dünya Bankının məlumatına əsasən, 2024-cü ilin iyul ayında özünüməşğulluq proqramının genişləndirilməsi üçün 150 milyon ABŞ dolları məbləğində əlavə maliyyələşdirmə təsdiq edilib.

Əlavə maliyyələşdirmə Azərbaycanın özünüməşğulluq proqramını dəstəkləməyə davam edəcək və iqtisadi fəaliyyətin şaxələndirilməsi və şoklara davamlılığın təmin edilməsi üçün istehsal və xidmətlər kimi yeni sektorlara genişləndirilməsini təmin edəcək.

Bundan əlavə, bu maliyyələşdirmə benefisiarlara təkmilləşdirilmiş pul qrantları sxemini sınaqdan keçirmək imkanı verəcək. Bununla onlar öz bizneslərini genişləndirmək üçün vəsaitlərdən istifadə edə biləcəklər.

AESP üçün əlavə maliyyələşdirmə, həmçinin Azərbaycan Dövlət Məşğulluq Agentliyinin iş axtaranlar üçün xidmət və proqramlar spektrini genişləndirmək imkanlarını təkmilləşdirəcək. Bu yeni dəstək sayəsində agentlik iş yerində təlim, əməkhaqqı subsidiyaları, peşə təlimi və müəyyən peşələr üçün sertifikatlaşdırma haqqının ödənilməsi kimi əlavə aktiv əmək bazarı tədbirlərini həyata keçirəcək. Bu proqramların iş axtaranların məşğulluğunu stimullaşdıracağı və onların istehsal, eləcə də xidmət sektorunda məşğulluq imkanlarını artıracağı gözlənilir.

Qeyd edək ki, bu günə qədər layihə çərçivəsində 100 milyon ABŞ dolları məbləğində ümumi öhdəlikdən 87,8 milyon ABŞ dolları ayrılıb.

Ötən ilin noyabr ayının sonuna olan məlumata görə, 80 mindən çox müraciət daxil olub ki, bunlardan 29 mindən çox iştirakçı seçilib. 27 mindən çox insan biznes bacarıqları üzrə təlim keçib və təxminən 19 min iştirakçı öz işini idarə etmək üçün aktivlər əldə edib.

Xatırladaq ki, layihə 2020-ci ildə başlayıb və Azərbaycan Əmək və Əhalinin Sosial Müdafiəsi Nazirliyi tərəfindən həyata keçirilir. Layihənin icra müddəti 2029-cu ilin dekabrın 31-dək uzadılıb.

©report