Cənubi Koreyanın texnologiya nəhəngi "Samsung Electronics", Cənubi Koreyada yerləşən robot istehsalçısı "Rainbow Robotics" şirkətinin ən böyük səhmdarı olub. 

Valyuta.Az xəbər verir ki, şirkət 181 milyon dollar ödəyərək "Rainbow Robotics"dəki payını 14,71 faizdən 35 faizə yüksəldib.

"Samsung", bu investisiyanın robot texnologiyaları şöbəsini gücləndirmək və insanabənzər robotların inkişafını sürətləndirmək məqsədilə edildiyini açıqladı. Razılaşmaya əsasən, "Rainbow Robotics" şirkətinin "Samsung"un törəmə şirkəti kimi fəaliyyət göstərəcəyi və bu prosesin 2025-ci ilin fevralında tamamlanacağı gözlənilir.

Bundan əlavə, "Samsung" birbaşa baş direktora bağlı bir robot texnologiyaları ofisi quracağını da bəyan etdi. Bu razılaşma "Rainbow Robotics"ə "Samsung"un resurslarından yararlanaraq beynəlxalq bazarlara çıxış imkanı qazandırır.

2011-ci ildə Koreya İrəliləmiş Elm və Texnologiya İnstitutu ("KAIST") Mərkəzində tədqiqatçılar tərəfindən qurulan "Rainbow Robotics", istehsal və logistika sahələri üçün ikiqollu mobil manipulyatorlar və avtonom mobil robotlar hazırlayır.

Bu yatırımla "Samsung", insanabənzər robotlar yarışına qoşulan 2024-cü ilin sonuncu şirkəti oldu. "Microsoft" və "OpenAI" texnologiyalarını insanabənzər robotlar üçün istifadə etməyi planlaşdırır, "Tesla" isə ilin əvvəlində "Optimus" adlı robot yanaşmasını təqdim etmişdi.

"Nvidia" isə 2025-ci ildə insanabənzər robotlar üçün "Jetson Thor" adlı yeni kompakt kompüter seriyasını bazara çıxarmağı nəzərdə tutur.