ABŞ-nin texnologiya şirkəti "Apple"ın səhmləri ABŞ birjalarında günlük zirvəyə çatıb və şirkətin bazar dəyəri 4 trilyon dollar həddinə yaxınlaşıb.  

Valyuta.Az xəbər verir, "Apple" səhmi cümə axşamı erkən saatlarda rekord qıraraq 260 dollara çatıb. Həmin gün səhmlər 0,3% artaraq 259 dollarda bağlanıb və yenidən rekord səviyyədə qeydə alınıb. Son bir ay ərzində səhmlər 11%-dən çox yüksəlib və "iPhone" istehsalçısı 4 trilyon dollarlıq bazar dəyərinə yaxınlaşıb.  

"Yahoo Finance"ın məlumatına əsasən, mütəxəssislər Tim Kukun (Tim Cook) rəhbərlik etdiyi texnologiya nəhənginin 2025-ci ildə böyümə baxımından "qızıl dövr" yaşayacağını proqnozlaşdırırlar. "Wedbush" analitiki Dan Ays (Dan Ives) "Apple" səhmləri üçün qiymət hədəfini 325 dollara qaldırıb.  

Ays deyib: “Biz inanırıq ki, "Apple" hələ də bazar tərəfindən layiqincə qiymətləndirilməyən, süni intellekt dəstəkli, uzunmüddətli "iPhone" yeniləmə dövrünə daxil olub.” O əlavə edib: “Roma bir gündə qurulmadı və "Apple"ın süni intellekt strategiyası da bir gündə formalaşmayacaq. Ancaq "Apple Intelligence" ilə bu strategiyanın təməlləri hazırda qurulur və gələcək illərdə istehlakçı artımı hekayəsini dəyişəcək.”  

Çətinliklərlə keçən 2024

"Apple" üçün 2024 çətin bir il olub. Şirkət gözlənilən səviyyədən aşağı "iPhone" satışları, Çində artan rəqabət və həm daxili, həm də beynəlxalq səviyyədə antitrest məhkəmələri ilə üzləşib.  

Buna baxmayaraq, mütəxəssislər "Apple"ın istehlak cihazlarına süni intellekt strategiyası ilə bağlı etimadın artacağına inanır və səhmlərlə bağlı nikbin proqnozlarını davam etdirirlər. Şirkətin noyabrın əvvəlində dərc etdiyi dördüncü rüb gəlir hesabatı, texnologiya nəhənginin ümumi proqnozlara uyğun gəlməməsinə baxmayaraq, "iPhone" satışlarında gözləntiləri üstələdiyini göstərib.  

 Süni intellektlə yüksələn "Apple" səhmləri

"Apple" yeni "MacBook Pro" seriyasını təqdim etdikdən və dekabrın ortasında ağıllı cihazlarına "ChatGPT" və digər "Apple Intelligence" süni intellekt xüsusiyyətlərini əlavə etdikdən sonra səhmlər noyabrın əvvəlindən etibarən yeni zirvələrə çatıb. Bu müddət ərzində "Apple" səhmləri 11%-dən çox dəyər qazanıb, "Meta" 6,7%, "Microsoft" 4,4%, "Nvidia" isə 1% yüksəlib.  

Qeyri-müəyyənliklər əks təsir göstərə bilər

Bununla belə, makroiqtisadi qeyri-müəyyənliklər "Apple" üçün mənfi təsir yarada bilər. ABŞ-ın yeni Prezidenti Trampın Çinə tətbiq etdiyi tariflər bu ölkədə istehsal olunan "Apple" məhsullarının qiymətlərinə təsir göstərə bilər. ABŞ Federal Ehtiyat Sisteminin 2025-ci ildə faiz dərəcələrini gözləniləndən daha az azaldacağı proqnozu yüksək faiz dərəcələrinin və inadkar inflyasiya qorxularının qalmasına səbəb olaraq yeni ilə istehlakçı inamını zəiflədib.  

Rəhim