Konqo Demokratik Respublikası Fransa və Belçika məhkəmələrində "Apple"a qarşı cinayət iddiası qaldırıb. 

Valyuta.az xəbər verir ki, bu barədə "Reuters" məlumat yayıb. 

Afrika ölkəsinin səlahiyyətliləri şirkəti Konqoda qeyri-qanuni olaraq çıxarılan minerallardan istifadə etməkdə ittiham edir.

Konqo kompüter və mobil cihazlarda istifadə olunan qalay, tantal və volframın əsas ixracatçısıdır. Bununla belə, ölkədə quldur dəstələrinin və qeyri-qanuni silahlı birləşmələrin nəzarətində olan yataqlar var. BMT və insan haqları təşkilatlarının məlumatına görə, belə mədənlərdə qul əməyindən istifadə edilir və qrupların özləri də mülki əhalinin kütləvi şəkildə öldürülməsi, zorlama, talan və digər cinayətlərdə ittiham olunurlar.

Konqo hökuməti iddia edir ki, "Apple" öz cihazlarında qeyri-qanuni mədənlərdən çıxarılan və sonra beynəlxalq təchizat zəncirləri vasitəsilə yuyulan minerallardan istifadə edir. Beləliklə, iddialarda deyilir ki, Amerika şirkəti cinayətlərin ortağı hesab edilməlidir.

"Apple" 2023-cü ildə ABŞ Qiymətli Kağızlar və Birjalar Komissiyasına təqdim etdiyi ərizədə onun mineral və qızıl tədarükçülərinin heç birinin Konqo və ya qonşu ölkələrdəki silahlı qrupları maliyyələşdirmədiyini iddia edib.

Konqo səlahiyyətliləri Fransa və Belçika məhkəmələrində iddia qaldırmağa qərar verilib. çünki onlar hesab edirlər ki, bu ölkələrdəki tənzimləyicilər korporativ hesabatlara münasibətdə xüsusilə sərtdirlər.

Paşa Məmmədli