Məşhur elektron ticarət platformaları "Shein" və "Temu" 2026-cı ildə Londonda Ali Məhkəmədə keçiriləcək məhkəməyə hazırlaşırlar. 

Valyuta.Az xəbər verir ki, bu rəqiblər bir-birlərini müəllif hüquqlarının pozulması və rəqabət əleyhinə davranışlarla bağlı ittiham edərək qarşılıqlı iddialar qaldırıb.

“Shein” ötən il Böyük Britaniyada "Temu" platformasında olan bəzi məhsul şəkillərinin müəllif hüquqlarını pozduğunu iddia edərək "Whaleco UK Limited"ə – "Temu"nun sahibi "PDD Holdings"in törəmə şirkətinə qarşı məhkəmə iddiası qaldırıb.

Temu isə cavab olaraq fevral ayında "Shein"i sürətli dəb məhsullarının tədarükçülərini eksklüziv müqavilələrləözünə bağlayaraq Britaniya rəqabət qanunlarını pozmaqda ittiham edib. Bu iddia 4,2 milyon funt sterlinq (5,5 milyon ABŞ dolları) dəyərində qiymətləndirilib, lakin "Shein" bu ittihamları rədd edir.

"Temu"nun vəkilləri çərşənbə axşamı keçirilən ilkin dinləmədə məhkəmə sənədlərində qeyd ediblər ki, "Shein" əsassız müəllif hüququ pozuntusu bildirişləri göndərməklə "Temu" platformasında məhsul satışına mane olur.

London Ali Məhkəməsində bu iddiaların 2026-cı ilin sonuna doğru məhkəməyə çıxarılması gözlənilir. "Shein"in vəkilləri də məhkəmə sənədlərində bu barədə bəyanat veriblər.

London məhkəməsi bu iki rəqib arasında qlobal miqyasda gedən hüquqi mübarizənin bir hissəsidir. "Temu" ötən ilin dekabrında ABŞ-da "Shein"ə qarşı iddia qaldırıb, "Shein" isə avqust ayında "Temu"ya qarşı öz iddiasını irəli sürüb.

Həm "Shein", həm də "Temu" beynəlxalq bazarlarda aşağı qiymətə geyim, aksesuar və texniki məhsullar sataraq sürətlə genişlənir. Lakin hər ikisi artan diqqət mərkəzindədir.

“Shein” insan haqlarına riayət etdiyini və məcburi əməyə sıfır dözümlü yanaşmaya malik olduğunu bildirsə də, işçi hüquqları və ətraf mühitlə bağlı məsələlərlə üzləşir. Xüsusilə də potensial olaraq Londonda səhmlərinin siyahıya alınması ərəfəsində bu mövzular diqqətdədir.

Digər tərəfdən, "Temu" Avropa Komissiyasının qanunsuz məhsul satışının qarşısını almağa yönəlmiş qaydaları pozub-pozmadığını araşdıran təhqiqatı ilə üzləşir. "Temu" bu təhqiqatda tənzimləyicilərlə əməkdaşlıq edəcəyini açıqlayıb.

Aydın