Ən ucuz qatlanan smartfon "Blackview Hero 10" 429 dollara satılmağa başlayıb.

Valyuta.az "GizmoChina" portalına isrinadən xəbər verir ki, yeni məhsul "Samsung Galaxy Z Flip"ə bənzəyən qapaqlı forma faktorlu smartfondur. 

"Blackview Hero 10" daha az məhsuldar aparat sayəsində ucuzlaşdırılıb - bir çox rəqiblərdən fərqli olaraq, Çin gadgetı ucuz "MediaTek Helio G99" çipi ilə təchiz edilib. O, həmçinin 12 GB LPDDR4X RAM və 256 GB daxili UFS 2.2 yaddaşa malikdir - bu parametrlərdə rəqiblər daha müasir yaddaş standartları təklif edirlər.

1080 x 2560 piksel təsvir ölçüsünə malik 6,9 düymlük çevik AMOLED ekran 120 Hz yeniləmə sürətini və 1300 nit-ə qədər pik parlaqlığı dəstəkləyir. İstehsalçı cihazın mexanizminin 250 minə qədər bükülməyə tab gətirə biləcəyini vəd edir. Hər gün smartfonunuzu 100 dəfə açsanız, bu, demək olar ki, 7 il üçün kifayət edəcək.

"Hero 10"un əsas kamerası 108 MP-dir, 8 MP təsvir ölçülü ultra geniş bucaqlı modulla tamamlanır, selfi kamerası isə 32 MP təsvir ölçüsünə malikdir. Yeni məhsul xüsusi DokeOS 4.0 qabığı ilə "Android 13" əməliyyat sistemi ilə işləyir. İstehsalçı "Android 16"nın buraxılışına qədər smartfonu dəstəkləyəcəyini vəd edir.

Qatlana bilən smartfon 45 Vt sürətli şarj dəstəyi ilə 4000 mAh batareyaya malikdir. Yeni məhsulun digər xüsusiyyətləri arasında stereodinamiklərin, NFC-nin və iki SİM kart üçün yuvanın olması qeyd olunur.

Paşa Məmmədli