İngiltərə Premyer Liqası təmsilçisi “Everton”un hesabından 2020/21 və 2022/23 mövsümləri arasında üç mövsüm üçün Premyer Liqanın Mənfəət və Davamlılıq qaydalarını (PSR) növbəti dəfə pozduğuna görə daha iki xal silindi. 

Valyuta.az xəbər verir ki, qərardan sonra “Everton” bir pillə geriləyərək 16-cı yerə düşdü. Hazırda komanda səviyyəsinə görə ikinci dərəcəli çempionat sayılan Çempionşipə düşmə zonasına daha da yaxınlaşıb. Onlar sözügedən zonadan cəmi iki xal və iki pillə yuxarıdadır.   

“Everton” üç mövsüm ərzində 105 milyon funt-sterlinqlik (122 milyon avro) limiti pozaraq, əlavə 16,6 milyon funt-sterlinq (19,3 milyon avro) xərcləyib. Bu səbəbdən Premyer Liqa və Maliyyə Feyr-Pleyi Komissiyası “Everton”dan daha beş xal silmək istəsə də müəyyən yumşaldıcı amillərə görə bu, iki xala endirildi.

“Everton”un 2018/19 və 2021/22 mövsümləri arasında maliyyə Feyr-Pleyi qaydalarının pozulmasına görə əvvəlcə 10 xalı silinmişdi. Daha sonra cəza altı xala endirilmişdi. “Everton” Premyer Liqada xalı silinən dördüncü komanda olub. Buna qədər, 1996/97 mövsümündə “Midlsbro”dan üç, 2010-cu ildə “Portsmut”dan doqquz, bu mövsüm isə “Nottingem Forest”dən dörd xal silinmişdi. 

Qaydalara görə, klublar üç il ərzində maksimum 105 milyon funt-sterlinqə qədər itki ilə üzləşə bilər. 

Bəs “Everton” 2020/21 və 2022/23 illəri arasında nə qədər xərcləyib. Sözügedən üç mövsüm ərzində təkcə oyunçu transferlərinə “Everton” 192,07 milyon avro xərcləyib. Nəticədə 38,02 milyon avro dəyərində itki ilə üzləşib. Həmin dövrdə Liverpul təmsilçisinin ən bahalı transferləri Aleks İvobi (30,4 milyon avro), Ben Qodfri (27,50 milyon) və Allan (24,60 milyon avro) olub. “Everton” bu müddət ərzində oyunçu satışından 154,05 milyon avro qazanıb.

Sözügedən müddət ərzində daha 13 klub itki ilə üzləşib. 2020/21 və 22/23 mövsümləri arasındakı itkilərə görə “Çelsi” (698,00 milyon avro) siyahıya başçılıq edir. Bununla belə, 2014/15 və 2020/21 mövsümləri arasındakı daha geniş dövrə nəzər salsaq, “Everton” cəmi 351,78 milyon avro dəyərində maliyyə itkisinə görə dördüncüdür. 

Evertonun Premyer Liqada qalma ümidləri bugünkü elanla kütləvi şəkildə azalsa da, onların perspektivləri hələ də toxunulmaz olaraq qalır. Klub ikinci cəzaya qədər 29 xalla 15-ci yerdə idi. Liverpullular şənbə günü “Börnli”ni 1:0 hesabı ilə məğlub etmələrinə baxmayaraq xal silinmə qərarından sonra bu qələbənin heç bir əhəmiyyəti qalmayıb. Bu səbəbdən komandanın aşağı liqaya düşməsi ehtimalı yüksək qiymətləndirilir. 

Elmir