İqtisadiyyat Nazirliyi yanında Dövlət Vergi Xidmətində ötən ilin sonu yaradılan vergi ombudsmanı xidməti baş idarəsinə ilk dəfə rəis təyin edilib. Bu vəzifəyə Arif Quliyev təyin edilib.

Baş İdarənin yaradılması və vergi ombudsmanının təyin edilməsi bu sahədə səmərəliliyin artırılmasına, sahibkarların qarşılaşdığı məsələlərin həllində onlara hansı dəstəkləri verəcək?

Bu barədə Valyuta.az-a danışan iqtisadçı Natiq Cəfərli bildirib ki, ombudsmanın fəaliyyəti vergi ödəyiciləri, iş adamları ilə, vergi orqanları arasında  bu sahədə baş verən neqativ hallarda barışdırıcı rol oynayacaq:

“Bəzi problemli məsələlərdə isə məhkəmələrə gedib çıxmadan problemin həllinə çalışılacaq”. 

İqtisadçı bildirib ki, Baş İdarə vergi ödəyicilərinin hüquqlarını qoruya bilən bir instituta çevrilməlidir:

“Bu baxımdan da effektiv və güvənilir olacaqsa iş adamlarının, iş dünyasının güvənini qazanacaqsa, məhkəməyə gedən işlərin sayı xeyli azalacaq. Amma vergi ombudsmanlığı biznes subyektləri arasında olan mübahisələri tənzimləmək üçün deyil. Bu biznes subyektləri ilə dövlət arasında olan mübahisələri tənzimləmək institutudur. Ona görə düşünürəm ki, bu effektiv və güvənilən quruma çevriləcəksə, bu zaman məhkəmələrə gedən işlər də azalacaq. Necə deyərlər, biznes sahiblərinin şikayət edəcək bir qapı yaranacaq. Bu da nəticə etibarı ilə biznesin inkişafına müsbət təsir edəcək”. 

“Dövlət necə etməlidir ki, vergi ombudsmanlıq institutu vergi xidməti ilə sahibkarlar arasında yaranan problemlərin həllinə effektiv təsir göstərsin” sualına cavab olaraq Natiq Cəfərli bildirib ki, ən əvvəl ombudsman özünü doğrultmalıdır:

“Elə şəxs olmalıdır ki, həm cəmiyyətdə, həm də iş çevrələri tərəfindən güvənilən insan olsun. Elə olmalı deyil ki, bu vergi ombudsmanlıq institutu dövlətin maraqlarını həyata keçirsin, onlara xidmət eləsin. Belə olacaqsa, effektivliyi aşağı olacaq. Ancaq sahibkarların, iş adamlarının mənafeyi üçün sözün yaxşı mənasında vuruşacaqsa, bu zaman onun effektivliyi də kifayət qədər yüksək ola bilər”. 

Davud