"Bakı şəhəri üzrə müəllimlərin 80%-dən çoxu qadınlardır".

Bunu Valyuta.az-a açıqlamasında təhsil eksperti Məzahir Məmmədli təhsil sahəsində kişi müəllimlərin azalmasına və gender balansının pozulmasına münasibət bildirərkən deyib. 

Ekspert bildirib ki, bölgələrdə bu rəqəm bir az fərqlidir:

"Bu kənd məktəblərində özünü daha çox göstərir. Problem hər gün müzakirə olunur. Qadınlar təmsil olunduğu məktəblərdə yetişən şagirdlərdə qadın xarakteri, qadın tipi formalaşdırır. Ona görə də bu məsələ xüsusi narahat edir. Belə fikirlər var ki, qadınlar MİQ imtahanında  fəaldırlar, biliklidirlər və onlar bu yerlərə daha çox layiq görülürlər. Amma məsələnin bir başqa tərəfi də var. Bu peşəyə gəlmək istəyənlərin özləri belə azlıq təşkil edir".

Məzahir Məmmədlinin fikirincə, bunun qarşısının alınmasının bir mexanizmi var:

"Təklif edərdim ki, bununla bağlı Elm və Təhsil Nazirliyi Müdafiə Nazirliyi ilə birgə sənəd hazırlaya bilər. Necə ki, bu SSRİ dövründə də olub. Kənd məktəblərində dərs deyən müəllimlər hərbi xidmətdən azad olunurdular. Müəllimlərin yenidən məktəbə qayıtması üçün onlara müəyyən güzəşt limiti müəyyən olunmalıdır. Onlar kənd məktəblərində işləsələr, hərbi xidmətdən azad olunsunlar. Şəhər məktəbində işləyən kişilər MİQ-dən xüsusi imtiyaz qazana bilsinlər, ayrılan vakansiyalarda kişilər üçün limitlər ayrılsın".

Qeyd edək ki, Dövlət İmtahan Mərkəzinin Direktorlar Şurasının sədri Məleykə Abbaszadə təhsil sahəsində kişi müəllimlərin azalmasına və gender balansının pozulmasına öz münasibətini bildirib: "Gender balansı pozulub. Müəllimlərin əksəriyyəti qadınlardır. Ancaq məktəb direktorlarının əksəriyyəti kişilərdir. Dövlət qulluğunda da biz görürük ki, təhsil sahəsində rəhbər vəzifələrdə kişilər üstünlük təşkil edir".

Aylin