Qarşıdan gələn flaqman kameralı telefon "Xiaomi 14 Ultra"nın yüksək keyfiyyətli renderləri internetə sızıb. 

Valyuta.az xəbər verir ki, görüntüləri "MySmartPrice" portalı dərc edib.

Yeni məhsul bəzi fərqlərlə praktiki olaraq keçən ilki "Xiaomi 13 Ultra"nın surətidir. Ən bariz olanı, "Xiaomi 14 Ultra"nı daha düşünülmüş cihaz kimi göstərən arxa qapaqdakı qabarın aradan qaldırılmasıdır. Demək olar ki, bütün Çin satıcılarının son bir neçə ayda istifadə etməyə başladığı yeni modelin kamera blokunun ətrafında çərçivə də var.

Şəkillərə əsasən smartfon ağ və qara rənglərdə süni dəri örtüklü olacaq. Ola bilsin ki, "Xiaomi" təqdimatda nümayiş etdiriləcək korpus üçün başqa rənglər hazırlayır. Həmçinin fotodan belə güman etmək olar ki, "Xiaomi 14 Ultra"nın çərçivələri titandan hazırlanacaq.

Şayiələrə görə, "Xiaomi 14 Ultra" sələfindən çox da fərqlənməyəcək. O, eyni 6,78 düymlük LTPO AMOLED displeyi, dörd 50 meqapiksellik Leica kamerasını alacaq. Əsas dəyişikliklərə yeni Snapdragon 8 Gen 3 çipi, 5300 mAh batareya və HyperOS ilə Android 14 daxildir.

Son sızmalara görə, "Xiaomi 14 Ultra"nın Avropadakı qiyməti 1600 avro təşkil edəcək ki, bu da smartfonu şirkətin kolleksiyasında ən bahalılardan birinə çevirəcək. Flaqmanın təqdimatı fevralın 25-də baş tutacaq.

Paşa Məmmədli