Bəzi restoranlarda müştərilərə təqdim olunan məhsulların yenidən istifadə olunduğunu haqqında fikirlər var. Məsələn, səhər yeməyindən qayıdan bəzi məhsulların digər müştərilərə satılması, artıq qalan məzələrin yenidən müştərilərə təqdim olunması və s kimi. Bəzən çox ucuz səhər setləri təklif edən restoranlarda bu halın olması daha çox şübhə doğurur. Bəs bu fikirlərin doğru olmaq ehtimalı nə qədərdir? Həqiqətən də bu işi görən restoranlar varmı?

Bu barədə Valyuta.az-a danışan süfrə mədəniyyəti üzrə ekspert və restorator Mahir Əhmədzadə qeyd edib ki, hansısa restoranın belə ucuz yollardan istifadə edəcəyinə inanmır:

“İstifadə olunan bütün məhsulların yenidən müştəriyə satılması mümkün deyil. Müştərinin qarşısından qayıdan məhsulu istifadə etmək qəti olmaz və inanmıram ki, hansısa restoran onu istifadə etsin. Amma dünyada belə bir təcrübə var ki, otel restoranlarında məsələn, səhər yeməyindən tərəvəz qalırsa, bunu nahar yeməyində istifadə edirlər. Çünki, bu məhsul keyfiyyətlidir və itkiyə getməsinin qarşısını alır. Müştərinin qarşısından qayıdan məhsulları yenidən satışa çıxarmaq restorana heç nə vermir. Bunun bir mahiyyəti də yoxdur ki, oradan böyük məbləğdə pul qazanılsın. Hazırda bu sektorda o qədər rəqabət var ki, bu baxımdan da bu heç düzgün strategiya deyil, həmin restoranlar öz müştərilərini itirirlər”. 

Bu prosesin bütün sektorlarda olduğundan danışan restorator bu işin vicdan məsələsi olduğunu vurğulayıb:

“Bu heç vaxt ola bilməz – fikri də düz deyil. Nümunə olaraq ət satışını göstərə bilərik. Ət satanlardan dana əti, quzu əti və s. satan insanlar var. Sonralar ortaya başqa heyvanların ətlərini satan şəxslər meydana çıxdı. Bu o demək deyil ki, hamı bu işi görür, hər işi keyfiyyətli şəkildə həyata keçirənlər var. Burada vicdan məsələsi önəmlidir”.

Əvəz Həsənov