“Hazırda dövlət ödənişlərin nağdsız qaydada aparılması üçün müxtəlif tədbirlər görür. Biz də dövlətə bu sahədə yardım göstərməyə çalışırıq”.

Bunu “vergiler.az”a //trendbazar.az/ onlayn alış-veriş platformasını yaratmış və buna görə Kiçik və Orta Biznesin İnkişafı Agentliyindən (KOBİA) “Startap” şəhadətnaməsi almış "Trendbazar" MMC-nin rəhbəri Tural Taib bildirib.

Müasir dünyada onlayn alış-verişin geniş yayıldığını deyən T.Taib Azərbaycanda da bu tendensiyanın artması məqsədilə yerli sahibkarlar, alqı-satqı ilə məşğul olan insanlar üçün belə bir platforma yaratmaq qərarına gəldiyini söyləyib. Onun sözlərinə görə, platformanın yaradılmasında əsas məqsəd yerli istehsal və idxal bazarının inkişafına yardım etməkdir. Platformada yalnız idxalçı şirkətlər öz məhsullarını nümayiş etdirmirlər, mağaza sahibləri, hətta VOEN-i olan vətəndaşlar da mallarını bu platforma vasitəsilə sata bilərlər: “Hazırda vətəndaşlarımız xarici ölkələrdən məhsul sifarişləri verirlər. Biz istəyirik ki, xaricdən mal gətirən sahibkarlarımız o malları təkcə öz mağazalarında satmasınlar, virtual mağaza yaradaraq Azərbaycanın hər bir yerinə satış edə bilsinlər. Bizim platformada məhsul sata bilmək üçün sahibkar orada qeydiyyatdan keçməli, onun VOEN-i və bank hesabı olmalıdır. Bu tələblərə cavab verən sahibkar “Trendbazar”ın daxilində virtual mağaza açır. Platformada bütün sahələr üzrə məhsullar - geyimlər, kənd təsərrüfatı avadanlıqları, avtomobillər, aksesuarlar, tikinti və inşaat, gözəllik və sağlamlıq məhsulları və s. satılır. Platformada 700-ə yaxın "ana" və "bala" kateqoriya var. Platformada satıcılar üçün pərakəndə və topdansatış, daxili auksion kimi funksiyalar var. Alıcılar üçün isə elan sistemi var. Alıcı öz əlindəki malı elan kimi yerləşdirə bilər, ancaq VOEN-i, bank hesabı olmadığı üçün onu bir satıcı kimi sata bilməz. VOEN-i olan sahibkarlar isə, birbaşa olaraq, onlayn satışla məşğul ola bilərlər. Əsas məqsədimiz odur ki, yerli bazarımız güclənsin və sahibkarlar əllərindəki malı platforma vasitəsilə bütün Azərbaycan ərazisində sata bilsinlər”.

T.Taib əlavə edib ki, platforma yeni olduğu üçün burada alıcı və satıcı kimi qeydiyyatdan keçənlərin sayı hələlik çox deyil. Alıcı kimi qeydiyyatdan keçənlərin sayı 1000 nəfəri ötüb, təsdiqlənmiş satıcıların sayı isə 20-dən çoxdur: “Biz şərait yaratmışıq ki, sahibkarlar, biznesmenlər özləri sayta daxil olub istədikləri formada satış həyata keçirsinlər. Biz platformada “azad zona” yaratmışıq ki, sahibkarlar burada öz məhsullarını müstəqil formada sata, məhsullarını reklam edə bilsinlər. Bizim üstünlüyümüz daha geniş platforma olmağımızdadır, sahibkarlara veb üzərindən canlı dəstək göstəririk, “Qaynar xətt”imiz var”.

Startapçı əlavə edib ki, hazırda dünyanın bir çox ölkələrində sahibkarlar öz məhsullarını satmaq üçün innovativ üsullardan istifadə edirlər. Azərbaycanda isə sahibkarların əksəriyyətinin innovativ texnologiya haqda məlumatı çox azdır: “Buna görə istəyirik ki, komandalar yaradaraq onları mağazalara göndərək və sahibkarları bu platforma barədə məlumatlandıraq. Hazırda bunun üçün planlar hazırlayırıq. Bundan başqa, hazırda müştərilərə məhsullar "Azərpoçt" vasitəsilə göndərilir. Biz isə istəyirik ki, kuryer sistemi yaradaq və istəyən şəxslər sistemimizdə qeydiyyatdan keçərək “Trendbazar” məhsullarının ünvanlara çatdırılması üçün kuryerliklə məşğul ola bilsinlər”.