Valyuta.az Rəqəmsal marketinq və biznesin inkişafı üzrə menecer Rəqsanə Məmmədovanın “Bizneslərdə marketinqin cavab verməli olduğu 3 sual” yazısını təqdim edir.

Biznesin həcmindən asılı olmayaraq, marketinq 3 suala cavab verməlidir. Kimə? Harada? Nə?

Kimə? 

Kiçik biznes kimə, yəni hansı hədəf auditoriyasına məhsul satır? Bura yalnız demoqrafik (yaş, cins, yaşadığı ərazi) göstəricilər daxil deyil. Əsas məqsəd potensial müştərilərin hansı səbəblərə görə məhsul alınmasını təyin etməkdir. Adətən, bu, bir səbəbin üzərindən olmur. 

Ola bilər ki, brend faktoru önəmli olsun. Məsələn, brend kosmetika bazarında qərar vermədə vacib elementlərindən biridir. Və ya şirkətin yerləşdiyi ərazi önəmlidir. Məsələn, təhsil seqmentində, kursun ünvanı seçim faktorlarından biridir. Kredit şərtləri isə mebel alıcıları üçün qərarverici ola bilər. Bəzən rəqiblər üçün yazılan rəyləri oxuyub, insanların seçim faktorlarını bilmək olar. 

Növbəti addımda qiymət strategiyasını formalaşdırmalıdır. Buraya endirim kampaniyaları, aksiyalar, hissə-hissə ödəniş və s. daxildir. Kiçik şirkətlər adətən bazara daxil olmaq üçün dempinq qiymətdən istifadə edirlər. Ucuz qiymət şirkəti qısa müddət ərzində böyüdə bilər, amma uzun müddət ərzində isə şirkət müflis ola bilər. Ona görə də, qiymət siyasəti önəmlidir.

Keçək növbəti mərhələyə: Harada?

B2B biznes üçün bu zənglər və görüşlərdir. B2C üçün bu sosial media və ya pərakəndə mağaza ola bilər. Əslində burada çətin bir məqam yoxdur.

Sonuncu sual “Nə”?

Yəni, alıcılara hansı marketinq mesajları veriləcək? Rəqib üstünlük nədir? Məhsulun hansı xüsusiyyətləri satışı artıra bilər? Biznes, potensial alıcıya hansı mesajı verib satışları artıra bilər? 

Nə sualının cavabını tapmaq vaxt tələb edir. Bəzən isə çoxsaylı reklam testlərindən sonra bunu tapmaq olur. Bu proseslər elə də asan və sadə deyil. 

Ona görə kiçik sahibkarların minimal marketinq bilikləri olması, biznesin effektivliyini artıra bilər. Nəzəriyyədə olsa, marketinq sahəsində biliklər mütləqdir.